НАТО давлатлари Россия ҳужуми содир бўлган тақдирда қўлланадиган минтақавий мудофаа режаларини келишиб олди, деб хабар қилмоқда Reuters ва DPA ўз манбаларига таяниб.
Ҳали Вильнюсдаги НАТО саммитида тасдиқланиши керак бўлган режаларда альянс қўшинларининг қуруқликдаги ҳаракатини тезлаштириш ҳамда денгиз, ҳаво, кибермакон ва коинотдаги эҳтимолий ҳужумлардан ҳимояланиш йўллари батафсил баён этилган.
Бундан ташқари, ушбу режалар доирасида альянсга аъзо мамлакатларга қўшинларни модернизация қилиш ва моддий-техника таъминотини яхшилаш бўйича тавсиялар берилади. Шунингдек, НАТО аъзолари мудофаа харажатларини оширишга мажбур бўлади: Reuters ёзишича, ялпи ички маҳсулотнинг 2 фоизи альянс учун минимал талаб бўлади.
“Гап кўпроқ одамларни жалб қилиш, машғулотлар, ўқитишлар ҳақида бормоқда. Захираларни яратиш, тузилмаларни шакллантириш, асбоб-ускуналар сотиб олиш ҳақида, шунингдек, ишлаб чиқариш қувватлари тўғрисида гаплашяпмиз”, — деди НАТО Ҳарбий қўмитаси раиси Роб Бауер.
Альянс расмий вакилларининг фикрича, иштирокчи давлатлар томонидан бу режаларни амалга ошириш бир неча йил вақт олади.
Россиянинг Украинага кенг кўламли босқини муносабати билан Шимолий Атлантика альянси ўзининг мудофаа концепциясини бутунлай қайта кўриб чиқишга қарор қилганди. Хусусан, альянс ҳозирда ҳужумнинг биринчи куниданоқ ўз ҳудудининг “ҳар бир қаричини” ҳимоя қилишга ҳозирлик кўрмоқда.
Изоҳ (0)