Қирғизистон президенти Садир Жапаровнинг жияни Улан Жапаров ҳибсга олинди. Бу ҳақда 24.кг хабар берди.
Президент матбуот хизмати раҳбари Дайирбек Орунбеков маълумотни тасдиқлади. Улан Жапаров жиноий иш бўйича бошқа айбланувчилар билан бирга ҳибсга олинган.
32 ёшли айбланувчи Садир Жапаровнинг амакиваччасининг ўғлидир.
“У полиция ходимлари томонидан ҳибсга олинган. Бу ишда хусусий тадбиркорлар ва божхоначилар ҳам бор. Таъкидлайман, Садир Жапаров аввалроқ таниш-билиш ва қариндош-уруғлигидан қатъи назар, ҳар ким ўз қилмиши учун қонун бўйича жавоб бериши ҳақида огоҳлантирганди”, — дейди Дайирбек Орунбеков.
Улан Жапаров Бишкекда ҳибсга олинган ва 1-сонли тергов изоляторига жойлаштирилган.
“Дастлабки маълумотларга кўра, мазкур ҳолат юзасидан Қирғизистон Республикаси Жиноят кодексининг ‘Коррупция’ моддаси бўйича жиноят иши қўзғатилган. Мазкур ҳолат юзасидан ИИВ Тергов хизмати томонидан тергов ҳаракатлари олиб борилмоқда”, — дейилади хабарда.
Президент жияни суд қарори билан 26 июлга қадар ҳибсда бўлади.
Изоҳ (0)