Париж чеккасида 17 ёшли ўсмирнинг отиб ўлдирилиши ортидан бошланган тартибсизликлар мобайнида 12-13 ёшли болалар ҳуқуқ-тартибот идораларига ҳужум қилгани ва ўт қўйгани учун ҳибсга олинди, деб хабар бермоқда Independent нашри.
Францияда тартибсизликлар кетма-кет олти кун давом этди. Ўтган ҳафта давомида ҳибсга олинган 3 354 кишининг ўртача ёши 17 да, дейди Франция ички ишлар вазири Жералд Дарманин.
Ҳаммаси бўлиб, 99 та шаҳар ҳокимияти биноларига ҳужум уюштирилган, жумладан, Л’ай-ле-Роз коммунаси мэри Винсент Жанбруннинг уйига ёнаётган машина келиб урилган. Ҳодисада мэрнинг рафиқаси ва ёш болаларидан бири яраланган.
Тартибсизликлар 17 ёшли ўсмирнинг ўлдирилиши ортидан бошланди
Тартибсизликлар 28 июнга ўтар кечаси Париж чеккасида бошланиб, ундан ташқарига ҳам тарқалди. Бунга машина ҳайдаб кетаётган 17 ёшли ўсмирнинг полициячи талабига биноан тўхташдан бош тортгани ва отиб ўлдирилгани сабаб бўлди. Ҳуқуқ-тартибот идоралари воқеанинг барча ҳолатларини аниқлаш учун тергов бошлади. Ўсмирни отган полициячи ҳибсга олинди. У қасддан одам ўлдиришда айбланмоқда.
Франциядаги тартибсизликлар фонида барча маданий тадбирлар бекор қилинган ва жамоат транспорти тўхтатилган, намойишчиларга қарши курашга 45 минг полициячи жалб қилинган. Бироқ Парижда фавқулодда ҳолат жорий этиш режалаштирилмаган.
Изоҳ (0)