“Навоий кон-металлургия комбинати” компаниясининг Жанубий кон бошқармасига қарашли Самарқанд вилояти Қўшработ туманидаги Зармитан олтин конида 28 июнь куни соат 03:30 атрофида икки йигитнинг оғир тан жароҳати олган ҳолатдаги жасади топилди. Бу ҳақда “Дарё”га Бош прокуратура матбуот хизмати маълум қилди.
Қайд этилишича, 20 ва 24 ёшли йигитларнинг жасадлари кон ишчиларининг кийимида ва ёнларида иккита қопда жами 94 килограмм оғирликдаги маъдан тошлар бўлган ҳолда топилган. Уларнинг таркибида олтин бўлган маъданли тошларни талон-торож қилиш учун ғайриқонуний равишда киргани тахмин қилинмоқда.
Жасадларни 2-маъдан юклаш пунктига бориб қайтаётган машина оператори А.С. аниқлаган. Бирламчи маълумотларга кўра, оператор кабинаси машинанинг ён томонида жойлашган, унинг ҳаракат йўналиши қарама-қарши ён томонга бўлгани сабаб кўриш радиусида бўлмаган жойда ётган вақтда босиб ўтган бўлиши мумкин.
Таъкидланишича, ҳодиса жойига тезкор тергов гуруҳи аъзоларини ҳамда Қизилқум кон техника инспекцияси мутахассислари чиқиши таъминланган. Ҳозирда терговга қадар текширув ҳаракатлари давом эттирилмоқда.
Ҳалок бўлган фуқароларнинг шахсига аниқлик киритилган — 24 ёшли Ш.А. ва 20 ёшли И.Т. Улар Қўшработ тумани “Майинтепа” қишлоғида истиқомат қилиб келган.
Январь бошларида Қозоғистоннинг Ақмола вилоятидаги ишламаётган “Бестобе” кони ҳудудида ноқонуний олтин қазиб олувчилар ўзбекистонлик эркакнинг жасадини аниқлаганди. Марҳумнинг шахсига аниқлик киритилган, у 1982 йилда туғилган Ўзбекистон фуқароси бўлган.
Изоҳ (0)