Тошкентдаги Интерcонтинентал меҳмонхонасида Венгриянинг OTP банки томонидан Ипотека банкни сотиб олишнинг биринчи босқичи якунланишига бағишланган матбуот анжумани ўтказилди. Унда иқтисодиёт ва молия вазири ўринбосари Илҳом Норқулов, OTP Банк бошқарувчилар кенгаши раиси ўринбосари Ласло Вулф ҳамда Ипотека банк бошқаруви раиси Элёр Иномжонов иштирок этди.
Тадбир давомида банкни хусусийлаштириш жараёнлари ва келгусида амалга оширилиши режалаштирилаётган ишлар ҳақида маълумот берилди. Таъкидланишича, OTP Банк жисмоний филиаллар ва рақамли банкинг афзалликларини бирлаштирган гибрид модел бўйича ривожланишни режалаштирмоқда.
Анжуман иштирокчиларининг маълумот беришича, Венгрия OTP банки Ипотека банкни сотиб олишнинг биринчи босқичи якунланган бўлиб, 75 фоиз улушга эга асосий акциядорга айланган. OTP банк яқин уч йил ичида Ипотека банкнинг 25 фоиз улушини қўлга киритиш ва Ўзбекистон банкидаги улушини 98 фоизга етказиш ниятида. Ўзбекистон OTP гуруҳи фаолиятини бошлаган Марказий Осиёдаги илк мамлакатга айланди.
Мазкур битим Ўзбекистон банклари учун ғарб мамлакатлари иштирокида амалга оширилган биринчи хусусийлаштириш жараёни ҳисобланади.
Венгрия банки 2020 йил охиридан бошлаб Ўзбекистон банк секторини хусусийлаштиришда иштирок этиш имконияти бўйича музокаралар олиб борган. 2021 йилнинг кузида бўлиб ўтган учрашувлар натижасида томонлар Ипотека банкни сотиб олиш имконияти бўйича ўзаро англашув меморандумини имзолаган.
Ипотека банкни сотиб олиш бўйича шартнома 2022 йил декабрь ойида имзоланган. Битим миқдори 324 миллион долларни ташкил этган.
Маълумот учун, Ипотека банк Ўзбекистондаги бешинчи йирик банк ҳисобланади. Банк республика умумий бозорининг 8,5 фоизини эгаллаган, мижозлари сони 1,6 миллион кишини ташкил қилади.
Реклама ҳуқуқи асосида.
Изоҳ (0)