Ўзбекистон Қозоғистондаги ўрмон ёнғинига қарши курашиш ва унинг оқибатларини бартараф этишда барча зарур ёрдамни кўрсатишга тайёр. Бу ҳақда Шавкат Мирзиёев 12 июнь куни Қозоғистон президенти Қосим-Жўмарт Тўқаев билан телефон орқали мулоқотда айтиб ўтган.
Президент матбуот хизматининг хабар қилишича, суҳбат аввалида давлат раҳбари Абай вилояти ҳудудида рўй берган ўрмон ёнғини оқибатида инсонлар ҳалок бўлгани муносабати билан Қосим-Жўмарт Тўқаев ва қардош қозоқ халқига чуқур ҳамдардлик ва далда сўзларини изҳор этди. Табиий офатга қарши курашиш ва унинг оқибатларини бартараф этишда Ўзбекистон барча зарур ёрдамни кўрсатишга тайёр экани таъкидлади.
Президентлар Ўзбекистон билан Қозоғистон ўртасидаги яхши қўшничилик, стратегик шериклик ва иттифоқчилик муносабатларини янада мустаҳкамлашнинг долзарб масалаларини ҳам муҳокама қилган. Савдо, саноат, энергетика, транспорт, қишлоқ хўжалиги ва иқтисодиётнинг бошқа тармоқларида кооперация лойиҳаларини амалга оширишни жадаллаштиришга алоҳида эътибор қаратилди.
Минтақавий кун тартибидаги масалалар юзасидан ҳам фикр алмашилган.
Изоҳ (0)