Россиянинг кенг кўламли босқини бошланганидан сўнг армия ёшидаги олти мингдан ортиқ Украина фуқаролари Руминияга ноқонуний равишда кўчиб ўтган ва у ердан вақтинчалик бошпана олган. Бу ҳақда Руминия иммиграция органларининг маълумотларида айтилади. BBC нашрининг ёзишича, улар орасида армияга чақирилишдан қўрққанлар ҳам, жанговар ҳаракатларда қатнашиб, ҳарбий хизматни тарк этганлар ҳам бор.

Журналистларнинг таъкидлашича, Украинада ҳарбий хизматга чақириш жараёни “қийинчиликлар” билан кечади, ҳарбий хизматчиларни ёллашда коррупция катта муаммо ҳисобланади. BBC манбаларига кўра, баъзи одамлар ҳарбий хизматга чақирилмаслик учун ҳар ой пора бериб туради.

Яна 20 минг киши Руминияга қонуний йўл билан кўчиб ўтган, аммо улар орасида ҳам буни пора ёрдамида уддалаганлар бор. Чегарани ноқонуний кесиб ўтганлар том маънода ўз ҳаётини хавф остига қўйган. Норасмий маълумотларга кўра, чегара ҳудудида 90 киши ҳалок бўлган: баъзилари чегара участкаларидан бирида икки давлатни ажратиб турувчи Тиса дарёсига чўкиб кетган, баъзилари тоғларда музлаб қолган.

Фронтдан қочган ҳарбийнинг ҳикояси

BBC журналистлари Украинадан Тиса дарёсини кечиб ўтиб қочган ҳарбий хизматчилардан бири ҳақида ҳикоя қилди. У рус босқини бошланганидан бир ой ўтгач фронтга жўнатилган. Биринчи жангда, унинг сўзларига кўра, 27 нафар қуролдоши ҳалок бўлган, яна 57 нафари яраланган. Кўп ўтмай у ҳарбий бўлинмаси жойлашган ҳудуддан қочиб кетган — Украинани шарқдан ғарбга кесиб ўтиш учун унга бир неча ҳафта керак бўлган; ёрдам учун “гидлар”га бир неча минг евро тўлаган.

Қочоқ аскар Руминия қирғоқларига етиб боргач, уни украиналик патрул пайқаб қолган. Аммо у огоҳлантирувчи ўқлардан қўрқмаганини айтди: “Агар фронтда хизмат қилган бўлсангиз, ҳавога отилган ўқ билан сизга қарата отилган ўқнинг фарқига борасиз”.

Тоғ ошиб ўтган украиналикнинг ҳикояси

BBC’нинг яна бир суҳбатдоши ҳарбий комиссиядан армияга чақирув қоғозини олгач қочишга қарор қилганини айтди. У тўрт киши бўлиб Карпатдаги Мармарош тоғ тизмаси орқали чегарани кесиб ўтган. Йўлда улар қор бўронига тушиб қолган. Бир киши вафот этган. BBC суҳбатдоши тоғ тизмасидан тушиш вақтида йиқилиб, этик ва пайпоғидан айрилганини, совуқ ургани сабаб кейинчалик унинг бармоқларини кесиб ташлашганини айтиб берди.

Эркак тоғларда уч кеча ва тўрт кундуз вақт ўтказган, руминиялик қутқарувчилар уни “чалажон” ҳолда топишган. Журналистнинг агар қочганингиз учун қўрқоқ деб аташса, нима дейсиз, деган саволига у шундай жавоб берди: “Менинг ватаним йўқ. Фақат оилам бор”.