Бугун, 10 июнь куни эрталаб Анқарада МКЕ мудофаа машинасозлик ва кимё корхонасига қарашли ракета ишлаб чиқариш заводида портлаш содир бўлди. Туркия Мудофаа вазирлиги маълумотларига кўра, натижада заводнинг беш ишчиси ҳалок бўлган. 

“Анқаранинг Элмадағ туманидаги МКЕ ракета ва портловчи моддалар заводида портлаш юз берди. Портлаш оқибатида беш ишчи ҳалок бўлди. Ҳодиса юзасидан суд ва маъмурий тергов бошланди”, — дейилади Мудофаа вазирлиги баёнотида.

Завод Элмадағ тумани ҳудудида, тураржойлардан узоқда жойлашган. Cumhuriyet газетасининг ёзишича, портлаш овозини атрофдаги аҳоли пунктлари аҳолиси эшитган. 

TRT Haber телеканали хабарига кўра, жабрланганларнинг баъзилари оғир аҳволда шифохонага етказилган.

Воқеа жойига ўт ўчирувчилар ва шифокорлар етиб келган. CNN Турк хабарига кўра, ёнғин ўчирилган. Портлаш сабаблари ҳозирча маълум қилинмаган.