Сурхондарё вилоятининг қатор ҳудудларида 9 июнь куни чанг бўронлари кузатилди. Ҳолат акс этган видеолар ижтимоий тармоқларда тарқалди.
“Дарё”нинг Афғонистондаги мухбири хабар қилишича, чанг бўрони Мозори Шариф шаҳридан Афғонистоннинг шимолий вилоятларига, ундан кейин Ўзбекистоннинг Сурхондарё вилоятига кўчган.
Вилоят ФВБ матбуот хизмати берган маълумотга кўра, вилоятнинг Термиз шаҳри, Денов, Сариосиё, Ангор, Шеробод, Музработ, Қизириқ ва Бандихон туманларида 4-12 метр/секунд тезликда шамол эсиши сабабли чанг-тўзон кузатилди. Ҳодиса бўйича фуқаролардан ФВБга мурожаатлар келиб тушмади. Ҳозирда вазият барқарор.
“Ўзгидромет” 9 июнь куни айрим ҳудудларда, шу жумладан, Сурхондарё вилоятида чанг-тўзонлар кузатилиши мумкинлиги ҳақида аввалдан хабар берган эди. Прогнозларга кўра, бундай об-ҳаво 10 июнда ҳам кузатилиши мумкин.
Изоҳ (0)