“Ўзгидромет” дам олиш кунлари иссиқ бир оз пасайишини маълум қилди.
Қайд этилишича, ушбу ҳафтанинг ўртасидан Ўзбекистоннинг ғарбий ҳудудларига Волгабўйи ҳудудларидан нисбатан салқин ҳаво кириб келди. Икки кун давомида Қорақалпоғистон Республикаси ва Хоразм вилоятида ҳаво ҳарорати 7-10 даражага пасайди ва кеча кундузи 30-35 даражани ташкил этди.
9 июнь Бухоро, Навоий вилоятларида, 10–11 июнь кунлари марказий, жанубий ва шарқий вилоятларда иссиқ бир оз пасаяди. Бироқ, республика ҳудудининг катта қисмида ҳароратнинг пасайиши шимолий ҳудудлардек сезилмайди. Кундузги ҳарорат 33-38 даражагача пасаяди.
Республика бўйича қуруқ об-ҳаво сақланиб туради, фақат тоғли ҳудудларда шанба ва якшанба кунлари қисқа муддатли ёмғир ёғиши ва момақалдироқ бўлиши мумкин.
9–11 июнь кунлари республика бўйича баъзи жойларда шамол тезлиги 17-22 метр/секундгача кучайиши, айрим жойларда чанг-тўзон билан кузатилиши мумкин.
Тошкентда 9–11 июнь кунлари ҳаво бир оз булутли бўлади, вақти-вақти билан ўзгариб туради, ёғингарчилик кутилмайди. Ҳарорат дам олиш кунлари 36-38 даража бўлади.
“Ҳароратнинг пасайиши узоқ давом этмайди. Кейинги ҳафтада ҳарорат фони аввалги 35-40 даража, шимолда, жанубда ва чўл ҳудудларда 41-42 даражагача бўлган қийматларга қайтади”, — дейилади хабарда.
Изоҳ (0)