Жиззах шаҳрида севган қизини яланғоч расмларини каналларда тарқатиш билан қўрқитган йигит қўлга олинди, деб хабар беради ИИВ Киберхавфсизлик маркази.
Қайд этилишича, Жиззах шаҳрида яшовчи Ш.С. исмли қиз ИИБга севган йигити унинг яланғоч ҳолдаги видео ва фото тасвирларини ижтимоий тармоқларда тарқатиб юбормаслик эвазига 800 доллар талаб қилаётганини маълум қилган.
Ўрганишлар натижасига кўра, йигит Жиззах шаҳрида яшовчи 19 ёшли О.Р. экани, у Ш.С. билан севишиб, ишқий муносабатда бўлган вақтларида унга уйланиш истаги борлигини айтиб, ишончига кириш орқали яширин тарзда уни кийимсиз ҳолатда фото ва видео тасвирга олгани аниқланган.
Орадан бир қанча вақт ўтгач, О.Р. севган қизи Ш.С.ни бошқа йигит билан унаштирилганини эшитганидан сўнг, ўзида мавжуд бўлган уятли видеотасвир ва расмларини ғаразли мақсадда Telegram мессенжеридаги каналларга тарқатиб юбориб, никоҳ тўйини бузиш билан қўрқитган. Шунингдек, Ш.С.нинг уятли видео-фото тасвирларини ўчириш эвазига ғаразгўйлик билан 800 доллар талаб қилган.
Ўтказилган тадбирлар натижасида, О.Р. келишилган пулнинг бир қисми сифатида тақдим этилаётган 4 миллион сўм пулларни олган вақтида қўлга олинган.
Мазкур ҳолат юзасидан Жиноят кодексининг 165-моддаси (товламачилик) 1-қисми билан жиноят иши қўзғатилган. Қонунга мувофиқ, О.Р. томонидан содир этилган жиноий ҳаракатлар учун 3 йилдан 5 йилгача озодликдан маҳрум қилиш жазоси назарда тутилган.
Март охирларида Андижонда талаба қизнинг шахсий суратларини ижтимоий тармоқларда тарқатмаслик учун пул талаб қилган шахс ушлангани, шунингдек, Самарқандда эркак “Одноклассники”да танишган аёлнинг суратларини монтаж қилиб, тарқатиш билан таҳдид қилгани тўғрисида хабар берилганди. Бир неча кун олдин Тошкент вилоятида 19 ёшли қизнинг суратларини тарқатиш билан таҳдид қилган йигит қўлга олинганди.
Изоҳ (0)