Тошкент вилоятининг Бўка туманида Халқ депутатлари туман Кенгаши депутатларини “каламуш”, “хоин”, “ҳоким солдати” деб атаган бошқа депутат жавобгарликка тортилгани маълум қилинди. Бу ҳақда вилоят ҳокими Зоир Мирзаев қабулида бўлган депутатлар гапириб берди.
Маълум бўлишича, Халқ депутатлари Бўка туман Кенгашининг собиқ депутати Хуршида Обидова бошқа депутатларни ҳақорат қилиб, уларнинг шаъни ва қадр-қимматини камситган.
“Халқ депутатлари Бўка туман Кенгаши раиси Аббосов бетоб бўлгани боис, биз Халқ депутатлари вилоят Кенгаши раиси, вилоят раҳбари Зоир Мирзаев қабулига келиб, бизни ‘каламуш’, ‘хоин’, ‘ҳоким солдати’, деб атаган депутат ишини суд кўриб чиққанини, Кенгаш ва суд қарорини Халқ депутатлари вилоят Кенгаши котибияти мудири бекор қилмоқчилигини айтиш учун келдик. Обидованинг депутатлигига уч ярим йил бўлган бўлса, ўтган вақт давомида депутатлар ҳақида туҳмат, иғво тарқатиб келди. Депутат бошқа депутатларни ‘каламуш’, аёл депутатлар хоин, ‘Аббосовнинг солдати’, ‘иймонсиз’ депутатликка нолойиқлар деб атаган. Ҳатто у Халқ депутатлари туман Кенгаши котибияти мудирасини ахлоқсизликда айблаган. Шунинг учун у судга берилди. Суд Обидовани айбдор деб топиб, базавий ҳисоблаш миқдорининг 5 баравари миқдорида жарима қўллади. Депутат бундан норози бўлиб, вилоят апелляция судига берди. Суд буни кўриб, Обидованинг даъвосини рад қилди”, — дейди Халқ депутатлари Бўка туман Кенгаши раиси ўринбосари Усмон Жўраев.
Ҳоким қабулида бўлганларнинг таъкидлашича, Халқ депутатлари туман Кенгаши депутати Хуршида Обидованинг бу ҳаракатларидан сўнг унинг депутатлик ваколатини муддатидан олдин тўхтатиш бўйича қарор қабул қилган. Шунингдек, туман прокурори томонидан депутат дахлсизлигини бекор қилиш бўйича Кенгашга тақдимнома киритилган ва қўллаб-қувватланган.
“Мазкур ҳолатлардан сўнг Кенгаш Обидованинг депутатлик ваколатини муддатидан олдин тўхтатиб, унинг дахлсизлигини бекор қилиш ҳақида қарор қабул қилди. Обидова эса бундан норози бўлиб, судларга мурожаат қилди. Аммо даъвоси рад этилди. Шунга қарамасдан Халқ депутатлари вилоят Кенгаши котибияти мудири уни қўллаб-қувватлаб, бизнинг қароримизни бекор қилишга уринмоқда”, — дейди депутат.
Буни эшитган вилоят ҳокими котибият мудирини адвокатликда айблаб, Кенгаш қарорини бекор қилишга уринаётган котибият хато қилганини билдирди.
“Дарё” интернет нашри қабул давомида Халқ депутатлари томонидан айбланган собиқ депутат Хуршида Обидовани тополмади. Топишга уринишлари ҳам зое кетди. Шу сабаб таҳририят Обидованинг даъволарини ҳам тинглашга, унга минбар беришга тайёрлигини билдиради.
Изоҳ (0)