АҚШ айғоқчи сунъий йўлдошлари Каховка ГЭС тўғони портлашини унинг вайрон бўлишидан олдин аниқлаган. Бу ҳақда The New York Times хабар берди.

Байден маъмуриятининг юқори мартабали мулозимининг айтишича, АҚШ айғоқчи сунъий йўлдошлари Каховка тўғони қулашидан бир оз олдин портлашни пайқаган, аммо америкалик таҳлилчилар тўғоннинг қулашига ким сабабчи бўлганини ва бу айнан қандай содир бўлганини ҳалигача билмайди.

Расмийнинг сўзларига кўра, инфрақизил сенсорлар билан жиҳозланган сунъий йўлдошлар тўғон қулашидан бир оз олдин катта портлаш билан мос келадиган термал белгини аниқлаган.

АҚШ разведкаси таҳлилчилари тўғон қулаши ортида Россия тургани ҳақида гумон қилмоқда, деди исмини ошкор қилмаслик шарти билан маъмуриятнинг юқори мартабали расмийси. Аммо АҚШ разведка агентликларида портлашга ким жавобгар экани ҳақида аниқ далиллар мавжуд эмас.

Прогнозларга кўра, ракета ҳужуми бунчалик катта зарар келтириши мумкин эмас. Чекланган маконда портлаш пайтида энергия ички тузилмаларга ўтиб, жиддий зарар етказади. Шунга қарамай, мутахассислар бунинг учун юзлаб килограмм портловчи моддалар кераклигини илгари сурди.

“Бомба ёки ракетанинг ташқи портлаши тўғонга фақат кичик зарар келтирган бўларди. Бундай ҳалокатли таъсирга эришиш учун бир неча марта кўпроқ портловчи моддалар керак”, — дейди Иллинойс университетининг муҳандислик профессори ва портловчи моддалар бўйича эксперти Ник Глумак.

Украинада уруш бошланганидан бери Каховка ГЭС бир неча бор ўққа тутилган, томонлар бунда бир-бирини айблаган.

“Тўғонга етказилган зарар унинг қулаши учун етарли бўлганми ёки йўқми, ҳозирча аниқ эмас”, — деган экспертлар.