“Дарё” интернет нашрида “Президент топшириғи билан тут баргидан чой ишлаб чиқаришга киришган бухоролик тадбиркор муаммоларга дуч келмоқда. У Олий суддан ёрдам сўради”, сарлавҳали мақола эълон қилинган эди. Мазкур мақолага муносабат билдирган Олий суд ахборот хизмати мазкур иш Олий судда кўрилаётганини маълум қилди.

“Жорий йил 12 май куни Қарши шаҳрида бўлиб ўтган сайёр қабул чоғида Bukhara Melburry Tea Silk Worm МЧЖ вакили Олий суд раиси Бахтиёр Исломовнинг қабулида бўлиб, ўз шикоятини топширган. Айни вақтда ушбу шикоят Олий судда белгиланган тартибда ўрганилаётганлиги маълум қилинади”, — дейилади Олий суд ахборот хизмати хабарида.

“Дарё”даги мақолада президент Шавкат Мирзиёевнинг 2018 йил Бухоро вилоятига ташрифи чоғида вилоятда тут баргидан чой ишлаб чиқариш ва уни экспорт қилишга доир масала ҳам кўриб чиқилгани, шахсан давлат раҳбари томонидан бу ишни амалга ошириш бўйича масъулларга топшириқ берилгани, шунингдек президент топшириғини бажаришга ҳаракат қилаётган тадбиркор айни пайтда муаммоларга дуч келаётгани билдирилганди.

“Биз эски бинони олиб, уни бузиб ташлаб, қайта қурдик. Шунга қарамасдан инвестиция киритмагансизлар деган баҳона билан бино-иншоотларни тортиб олишди. Натижада 360 нафардан ортиқ ишчи ишсиз қолди. Хитойлик ҳамкоримиз томонидан киритилган 1 миллион долларлик, ўзимиз киритган 18 миллиард сўм инвестиция маблағларимиз куйиб кетмоқда. Биз тайёр қилган имкониятни тортиб олишди”, — деганди тадбиркор вакили Олий суд раисидан нажот сўрар экан.

“Дарё” воқеалар ривожини кузатишда давом этади.