Тошкентнинг яна қатор ҳудудларида электр таъминоти вақтинча тўхтатилди

Таъмирлаш ишлари туфайли Мирзо Улуғбек, Учтепа ва Шайхонтоҳур туманларининг айрим жойларида электр таъминоти вақтинча тўхтатилди. Бу ҳақда “Ҳудудий электр тармоқлари” АЖ ахборот хизмати хабар берди. 

Унга кўра, истеъмолчиларга сифатли ва барқарор электр энергияси етказиб берилишини таъминлаш, шунингдек, электр тармоқларида содир бўлиши мумкин бўлган авария ҳолатларининг олдини олиш ҳамда таъмирлаш ишларини хавфсиз бажариш мақсадида бугун, 8 июнь куни қуйидаги манзилларда соат 16:00 дан 18:00 гача электр таъминоти вақтинча тўхтатилди:

• Учтепа туманининг “Шарқ юлдузи” маҳалласи Дурбек, Дурбек 4-тор ҳамда Лочин кўчалари ҳудудида;
• Шайхонтоҳур туманининг Боғ кўча, Шайхонтоҳур, Лабзак, С.Хўжаев, Архитекторлар ва Х.Асомов кўчалари ҳудудида; 
• Мирзо Улуғбек туманининг Паркент, Олтинтепа ва Бўз маҳаллалари ҳудудида.

Мазкур таъмирлаш ишлари туфайли электр энергияси таъминотидаги вақтинча узилишлар сабабли етказилаётган ноқулайликлар учун истеъмолчилардан узр сўралган.

Шунингдек, маълум қилинишича, “Қўқон” подстанциясида 35 киловатли юқори кучланишли кабел тармоғининг шикастланиши натижасида фавқулодда авария ҳолатида электр энергиясидан узилиш содир бўлган. Бунинг натижасида, Миробод ва Яккасарой туманлари ҳудудидаги истеъмолчиларининг бир қисмида электр таъминотида узилиш кузатилмоқда.

Айни вақтда “Ҳудудий электр тармоқлари” АЖ Тошкент шаҳар филиалининг юқори кучланишли авариявий ҳолатларни бартараф этиш махсус тезкор бригадалари томонидан подстанциядаги носозликни бартараф этиш чоралари кўрилмоқда.

Бундан ташқари, юқори кучланишли электр тармоғидаги носозлик сабаб бир неча насос станциялари электр таъминотидан узилди. Бунинг натижасида Яшнобод, Яккасарой, Миробод туманларидаги бир қатор аҳоли массивлари сувсиз қолди.

“Ҳудудий электр тармоқлари”нинг билдиришича, ҳозирда подстанциядаги носозликни бартараф этиш чоралари кўрилмоқда. Олиб борилган тиклаш ишлари натижасида Яккасарой туманининг баъзи ҳудудларида электр энергияси қайта тикланган. Тез фурсатларда қолган ҳудудлар ҳам электр энергиясига қайта уланади.

Авариявий ҳолатни бартараф этиш ишлари тезкор бригада ходимлари ҳамда махсус техника ёрдамида узлуксиз олиб борилмоқда.