Тошкентнинг айрим ҳудудлари электр таъминотидан узилгани хабар қилинган эди. “Ҳудудий электр тармоқлари” ушбу ҳудудларда тез фурсатларда электр энергияси тикланишини эълон қилди.

Аввал хабар қилинганидек, Тошкент шаҳридаги “Қўқон” подстанциясида 35 киловатли кабел тармоғининг шикастланиши натижасида ёнғин содир бўлган эди. Бунинг оқибатида Миробод ва Яккасарой туманлари истеъмолчиларининг бир қисмида электр таъминотидан узилган.

Бундан ташқари, юқори кучланишли электр тармоғидаги носозлик сабаб бир неча насос станциялари электр таъминотидан узилди. Бунинг натижасида Яшнобод, Яккасарой, Миробод туманларидаги бир қатор аҳоли массивлари сувсиз қолди.

“Ҳудудий электр тармоқлари”нинг билдиришича, ҳозирда подстанциядаги носозликни бартараф этиш чоралари кўрилмоқда. Олиб борилган тиклаш ишлари натижасида Яккасарой туманининг баъзи ҳудудларида электр энергияси қайта тикланган. Тез фурсатларда қолган ҳудудлар ҳам электр энергиясига қайта уланади.

Авариявий ҳолатни бартараф этиш ишлари тезкор бригада ходимлари ҳамда махсус техника ёрдамида узлуксиз олиб борилмоқда.