Тошкентнинг Янгиҳаёт туманидаги 122-боғчада амалиёт ўтаётган коллеж талабаси томонидан ухламаган болалар оёғига игна тиқилгани хабар қилинганди. Суд қарори билан айбдорларга жазо белгиланди.
Суднинг 8 июндаги қарори билан ушбу боғча тарбиячиси С.Э. (1989 йилда туғилган) ва Андижоннинг Пахтаобод туманидаги Педагогика коллежининг 3-босқич талабаси бўлган М.Р. Маъмурий жавобгарлик тўғрисидаги кодекснинг 52-моддаси (енгил тан жароҳати етказиш) 2-қисмида назарда тутилган ҳуқуқбузарликни содир қилган деб топилиб, уларнинг ҳар бирига БҲМнинг 4 баравари (1 млн 320 минг сўм) миқдорида жарима жазоси тайинланди.
Суд томонидан Тошкент шаҳар мактабгача ва мактаб таълими бош бошқармаси бошлиғига содир этилган маъмурий ҳуқуқбузарлик юзасидан меҳнат муносабатларидан келиб чиқиб, расмий муносабат билдириш ва тегишли чора-тадбирлар белгилаш ҳамда ҳуқуқбузарлик содир этилишига имкон берган шарт-шароитлар юзасидан Маъмурий жавобгарлик тўғрисидаги кодекснинг 313-моддаси тартибида тақдимнома ҳам чиқарилган.
Шунингдек, ушбу боғча мутасаддиларига рўйхатдан ўтмасдан туриб, тарбияланувчиларни қабул қилинганлик ҳолати ва улар учун тўловлар амалга оширилганлигини текшириб, қонуний баҳо бериш мақсадида Маъмурий жавобгарлик тўғрисидаги кодекснинг 278-моддаси тартибида Янгиҳаёт туман прокурорига хабарнома юборилган.
Изоҳ (0)