Самарқанд вилоятининг Каттақўрғон шаҳрида бегона аёл хонадонига бостириб кирган уч йигитга суд ҳукми ўқилди. Йигитларнинг икки нафарига 5 суткадан қамоқ жазоси тайинланган бўлса, бир нафари жарима тўлайдиган бўлди. Бу ҳақда “Дарё”га вилоят ИИБ ахборот хизмати раҳбари Жаҳонгир Сагдуллаев хабар берди.

Қайд этилишича, ижтимоий тармоқларда ички ишлар ходимлари ҳамда икки нафар фуқаро ўртасида жанжалли ҳолат акс этган видео тарқалган.

“Айримлар буни ходимлар айбсиз фуқароларни куч ишлатиб, машинага босиб кетяпти, дея талқин қилди. Аслида 7 июнь куни соат тунги 24:00 да уч йигит Каттақўрғон шаҳрининг Алишер Навоий кўчасида жойлашган тунги клубга боришади. Шу пайти ҳудудда тунги хизматни ўтаб юрган профилактика инспекторларини кўриб, сабабсиз улардан яшириниш учун маҳалладаги хонадонлардан бирига кириб кетади.

Ярим тунда тақиллаган овозни эшитган уй эгалари кутилмаган бу ҳолатдан таҳликага тушиб қолишади. Уй бекаси қўрқиб, югуриб чиқади. Буни кўрган йигитлардан бири девордан сакраб, иккиси эса дарвозадан қочиб чиқади. Аёлнинг турмуш ўртоғи ва икки нафар фарзанди касал бўлгани сабабли нотаниш кимсаларнинг бостириб кириши уни қўрқувга солади”, — дейди вилоят ИИБ ахборот хизмати раҳбари.

Бегона эркакларнинг хонадонига бостириб кирганидан қўрққан аёл бу ҳақда ички ишлар ходимларига хабар беради.

“Профилактика инспекторлари икки нафар йигитни ушлаб, ИИБ биносига таклиф қилганда қаттиқ қаршиликка учрашди. Йигитлар маҳалла осудалигини бузиб, бақир-чақир қилиб, ходимлар билан жанжал қилишга ўтишган. Улардан бири ҳаттоки профилактика инспекторини уч жойидан тишлаб, жароҳат етказган”, — дейди масъул.

Қўшимча қилинишича, ҳолат расмийлаштирилиб, тўпланган ҳужжатлар Жиноят ишлари бўйича Каттақўрғон шаҳар судига юборилган. Суд 8 июнь куни ҳодиса юзасидан йигитларга нисбатан қарор чиқарди.

“Уларнинг ёшлигини, оилавий шароитлари инобатга олиниб бирига жарима, иккисига 5 суткадан маъмурий қамоқ жазоси тайинланди”, — дейди Жаҳонгир Сагдуллаев.