Қурилиш ва уй-жой коммунал хизмат кўрсатиш вазирлиги “Туризм транспорт коридори бўйлаб замонавий карвонсаройларни ташкил этиш чора-тадбирлари тўғрисида”ги ҳукумат қарори лойиҳасини муҳокамага қўйди.
Ҳужжат лойиҳасида қайд этилишича, Маданият ва туризм вазирлиги ҳамда Қурилиш ва уй-жой коммунал хўжалиги вазирлиги томонидан Туризм транспорт коридори бўйлаб қуриладиган замонавий карвонсарой намунавий лойиҳаси ишлаб чиқилган ва Вазирлар Маҳкамасида тақдимоти ўтказилган.
Қарор билан қуйидагилар белгиланмоқда:
- намунавий лойиҳада кўрсатилган карвонсарой таркибидаги элементлар (хоналар, автотураргоҳ ва бошқалар) қуриладиган ҳар бир карвонсаройда назарда тутилиши мажбурийдир;
- карвонсарой таркибидаги элементларнинг майдони, баландлиги ва қаватлар сони муайян ҳудуддаги шаҳарсозлик вазиятга мувофиқ ёнғин хавфсизлиги ва санитария талабларига риоя этган ҳолда объект буюртмачисининг истагига кўра ўзгартирилиши мумкин;
- намунавий лойиҳани муайян ер участкасига боғлашда ер участкасининг шакли ва рельефини хусусиятлари ҳамда ташқи муҳандислик коммуникация тармоқ трассаларининг йўналишига кўра карвонсарой элементларининг бир-бирига нисбатан жойлашувини ўзгартиришга рухсат этилади;
- ҳар бир карвонсарой архитектурасини тегишли ҳудуднинг меъморий, тарихий, географик, маданий хусусиятларига мувофиқ алоҳида лойиҳалаштирилади.
Туризм транспорт коридори бўйлаб қуриладиган замонавий карвонсаройларнинг манзилли рўйхати тасдиқланади.
Иқтисодиёт ва молия вазирлиги ҳузуридаги Кадастр агентлиги Автомобиль йўллари қўмитаси, Қорақалпоғистон Вазирлар Кенгаши ҳамда вилоятлар ҳокимликлари билан биргаликда Манзилли рўйхатда кўрсатилган карвонсаройлар қурилиши учун туризм транспорт коридори бўйидаги ташқи муҳандислик коммуникацияларга яқин бўш ер участкалари рўйхатини тузади ва уларда карвонсаройларни жойлаштириш таклифлар ишлаб чиқилишини ташкил этиш учун Қурилиш ва уй-жой коммунал хўжалиги вазирлигига киритади.
Қурилиш ва уй-жой коммунал хўжалиги вазирлиги Маданият ва туризм вазирлиги ҳамда Қорақалпоғистон Вазирлар Кенгаши, вилоятлар ва Тошкент шаҳар ҳокимликлари билан биргаликда назарда тутилган бўш ер участкаларида карвонсаройларни жойлаштириш таклифлари тақдимотини Мамлакатнинг туризм соҳасини ривожлантириш бўйича республика ишчи гуруҳида ўтказади.
Давлат активларини бошқариш агентлиги, Иқтисодиёт ва молия вазирлиги ҳузуридаги Кадастр агентлиги Қорақалпоғистон Вазирлар Кенгаши, вилоятлар ва Тошкент шаҳар ҳокимликлари билан биргаликда назарда тутилган ер участкаларини тадбиркорлик субъектларига электрон онлайн-аукцион орқали реализация этилишини таъминлайди.
Марказий банкка бир ой муддатда Манзилли рўйхатда назарда тутилган карвонсаройлар ҳамда Туризм транспорт коридори бўйида жойлашган тадбиркорлик субъектлари объектларининг ер участкаларида барпо этиладиган карвонсаройларни қуриш учун банклар томонидан тегишли тадбиркорлик субъектларига ўн йилда қайтариш шарти билан имтиёзли кредитлар бериш тартибини жорий этиш тавсия этилади.
Карвонсаройлар қуриш таклифи
Шавкат Мирзиёев 2022 йил 26 апрель кунги видеоселектор йиғилишида Ўзбекистондаги туристик зоналардан унумли фойдаланилмаётганини танқид қилиб, бир қатор топшириқлар берганди. Ўшанда Ўзбекистон туризм магистрали бўйлаб 31 та туман (шаҳар) ҳудудидан ўтувчи йўл бўйида комплекс туризм хизматларини (автотураргоҳ, кемпинг, автосервис, овқатланиш, ёнилғи қуйиш) қамраб олган 1 тадан карвонсарой барпо этиш вазифаси қўйилган.
Бундай лойиҳаларга бир ой муддатда 1 триллион сўм кредит ресурслари ажратилади, йил якунига қадар яна 100 миллион доллар жалб қилинади. Вилоят ҳокимлари ҳам камида 20 миллион долларлик лойиҳаларни ишга тушириши шартлиги кўрсатиб ўтилган.
Изоҳ (0)