Хитойнинг Шинжон-ғарбий минтақасидаги чўлда мамлакатнинг энг чуқур қудуғини бурғулаб қазиш ишлари бошланди, деб хабар бермоқда “Sinxua” давлат ахборот агентлиги.
Режага кўра, чуқурлиги 11 100 метр бўлган тор шахта қазилади, у 10 та континентал қатламдан ўтиб, ер қобиғидаги бўр тизимига — 145 миллион йиллик тарихга эга тош қатламларига етиб боради. Хитой таърифи бўйича “Ерни чуқур тадқиқ қилиш учун муҳим” бўлган лойиҳа 457 кун ичида якунланиши режалаштирилган.
Чуқур қудуқ Хитойга Ернинг ички тузилиши ва эволюциясини ўрганиш, шунингдек, геосиёсий тадқиқотлар учун маълумотлар алмашиш имконини беради.
Операцияда иштирок этган техник мутахассис Ван Чуншен ишнинг қийинлик даражасини ингичка пўлат кабеллар билан катта юк машинасини тортишга қиёслади. Қазиш учун ишлатилаётган қурилма оғирлиги 2 000 тоннадан ортиқ, у 200 градусгача ерости ҳароратга ва ер юзасидан 1 300 марта баланд бўлган атмосфера босимига мослаб яратилган. Маҳаллий иқлим бурғулаш ишларини мураккаблаштиради – лойиҳа мамлакатнинг энг иссиқ ва қурғоқчил чўлида амалга оширилмоқда.
Ҳозир қудуқ қазилаётган Шинжон минтақаси фойдали қазилма конлари ва нефтга бой. Май ойи бошида Хитойнинг энг йирик нефтни қайта ишлаш заводи Sinopec Tarim ҳавзасида 8 500 метрдан ошиқроқ чуқурликдан муҳим нефть ва газ оқимини аниқлаганди.
Изоҳ (0)