“Сурхон” клуби футболчиси Москвада гиёҳванд модда билан қўлга олинди

“Сурхон” клубининг россиялик футболчиси Шамил Гасанов Москвада гиёҳванд моддалар билан ушланди. Бу ҳақда Шот Telegram канали хабар бермоқда.

Манбага кўра, 6 июнь куни спортчи Боровское шоссесининг нотўғри жойидан югуриб ўтган ва бунинг учун уни Йўл-патрул полицияси тўхтатган.

Ҳуқуқ-тартибот идоралари ходимлари Гасанов асабийлаша бошлаганини пайқаб, уни текширишга қарор қилишди. Футболчининг чўнтагидан кўк рангли изолента билан ўралган пакет топилган.

Экспертиза ўрамдаги модданинг мефедрон эканлигини аниқлади. Гасановга нисбатан Россия Федерацияси Жиноят кодексининг 228-моддаси (гиёҳвандлик воситаларини қонунга хилоф равишда олиш, сақлаш, ташиш) билан жиноят иши қўзғатилган. Футболчи ҳозирда уй қамоғида сақланмоқда.

Маълумот учун, Шамил Гасанов жорий йилнинг 25 январь куни Махачқалъанинг “Динамо” клубидан Сурхондарёнинг “Сурхон” жамоасига келиб қўшилганди.