6 июнь куни Россия мудофаа вазири Сергей Шойгу Россия армияси уч кундан буён фронтнинг бир неча секторларида Украина Қуролли кучларининг ҳужумини ушлаб турганини маълум қилди. Унинг сўзларига кўра, бу вақт ичида Украинанинг йўқотишлари 3 715 нафар ҳарбий, 52 та танк, 207 та зирҳли жанговар техника, 134 та техника, 5 та самолёт, иккита вертолёт, 48 та дала артиллерия қуроли ва 53 та учувчисиз учар аппаратни ташкил этди.
Шойгунинг алоҳида баёнотида 5 июнь куни еттита йўналишда Украина Қуролли кучларининг ҳужуми тўхтатилгани, натижада 28 та танк, жумладан, саккизта немис Леопардлари ва учта француз АМХ-10 ғилдиракли танклари йўқ қилингани таъкидланган. 6 июнга ўтар кечаси Россия Мудофаа вазирлиги ҳам шундай мазмундаги ҳисобот эълон қилганди.
Шойгу ўз баёнотини тасдиқловчи ҳеч нарса кўрсатмаган. Бироқ тез орада Россия Мудофаа вазирлиги оммавий ахборот воситаларида “хорижий зирҳли техникалар, жумладан, Леопард танклари йўқ қилингани” тасвирланган қисқа видеони тарқатди.
Уруш тарафдори бўлган россиялик блогерларнинг кўпчилиги вазирлик берган видеода ҳақиқий зирҳли машиналар кўрсатилганига шубҳа қилишди.
“Ҳарбий хабарчи” Telegram канали машиналарнинг оқ-қора тасвирини таҳлил қилгандан сўнг, видеода аслида Американинг John Deere 9000 ва 700 серияли ғалла ўриш комбайнлари, шунингдек, Украинада жуда оммалашган John Deere 4830 трактор пуркагичи кўрсатилганини хабар қилди.
Урушни тарғиб қилувчи “Рибар” Telegram канали ҳам шундай хулосага келди.
“Агар кадрни катталаштирсангиз, объектнинг контурида қишлоқ хўжалиги техникасига ўхшаш нарсани кўрасиз. Ғилдираклар туртиб чиққан, ‘замбарак’ эса бурғуга ўхшайди. Айтганча, (зарба берган) вертолёт экипажининг ўзи ҳам муҳокамада нишонни Леопард деб атамаган”, — дейилади Telegram канал постида.
“Леопардлар йўқ қилинган” видеога “Вагнер” хусусий ҳарбий компанияси раҳбари Евгений Пригожин ҳам фикр билдирди.
“Бугун Россия Мудофаа вазирлиги танкка қарши бошқариладиган ракеталарни учирувчи аскарларнинг маҳоратли ишини эълон қилди. Бу кадрлар ‘Леопард’ танкларининг бир-бирига қараб ғалати тактик манёврда қандай ҳаракатланишини яққол кўрсатиб турибди. Ушбу танклар қишлоқ хўжалиги комбайнларига ўхшатиб маскировка қилинган. Уларнинг тумшуғи пастга эгилган. Бироқ бу бизнинг аскарларимизга душман техникаларини кўришга халал бергани йўқ”, — деди у.
Изоҳ (0)