Сурхондарё вилояти Жарқўрғон туманидаги ғалла майдонида ёнғин содир бўлди. Вилоят ФВБ ҳолат юзасидан маълумот берди.
5 июнь куни Жарқўрғон тумани “Боймоқли” маҳалласи ҳудудида жойлашган “Магнат агрохимия таъминоти” МЧЖга қарашли ғалла майдонида ёнғин содир бўлган. Бу тўғрисидаги хабар туман фавқулодда вазиятлар бўлимига соат 14:55 да хабар келиб тушган. Воқеа жойига ёнғин-қутқарув экипажлари соат 15:05 да етиб бориб, ёнғин соат 15:15 да қуршаб олинган ва соат 15:20 да батамом ўчирилган.
Қутқарувчиларнинг саъй-ҳаракатлари натижасида ғалла майдонининг 0,3 гектар қисми сақлаб қолинган ва оловнинг қўшни 30 гектар ғалла майдонига ўтиб кетишининг олди олинган. Воқеа жойига фавқулодда вазиятлар органлари масъуллари ва бошқа мутасаддилар етиб борган. Ёнғин оқибатида тан жароҳати олганлар йўқ.
Вилоят Фавқулодда вазиятлар бошқармаси берган бирламчи маълумотларга кўра, ёнғинга ҳудуддан ўтган 10 кВт электр тармоғининг ғалла майдонига узилиб тушиши натижасида содир бўлган қисқа туташув сабаб бўлган.
Ҳозирда моддий зарар миқдори аниқланмоқда.