Россия Мудофаа вазирлиги 4 июнь куни эрталаб Украина Қуролли кучлари фронтнинг Жанубий Донецк йўналишидаги бешта секторида кенг кўламли қарши ҳужум бошлаганини даъво қилмоқда. Бу ҳақда вазирлик 5 июнга ўтар кечаси баёнот берди.
Вазирлик маълумотларига кўра, жангларда Украина Қуролли кучларининг 23- ва 31-механизациялашган бригадалари бошқа ҳарбий қисмлар ва бўлинмалар кўмагида қатнашган. Ҳаммаси бўлиб, Россия Мудофаа вазирлиги маълумотларига кўра, Украина кучларининг олтита механизациялашган ва иккита танк батальонлари жалб қилинган.
Мудофаа вазирлигининг баёнотида айтилишича, Украина Қуролли кучларининг мақсади фронтнинг энг заиф секторида рус қўшинлари мудофаасини ёриб ўтиш бўлган.
“Душман ўз вазифаларини бажара олмади, муваффақиятга эришмади”, — дейилади баёнотда.
Вазирлик маълумотларига кўра, Украина Қуролли кучларининг йўқотишлари 250 нафардан ортиқ шахсий таркиб, 16 та танк, учта пиёдалар учун жанговар техника ва 21 та зирҳли жанговар техникани ташкил қилади.
Россия Бош штаб бошлиғи Валерий Герасимов “бу пайтда ушбу йўналишдаги илғор қўмондонлик пунктларидан бирида эди”, дейилади вазирлик баёнотида.
Украина Қуролли кучлари Россия Мудофаа вазирлиги баёнотига ҳозирча изоҳ бермади.
Запорожье вилоятининг Россия назорати остидаги қисми маъмурияти вакили Владимир Роговнинг маълум қилишича, 4 июнь куни тушдан кейин Украина Қуролли кучлари Запорожье йўналиши бўйича Россия қўшинларини ёриб ўтишга уринган. Унга кўра, Украина кучлари 400 метр илгарилаган, бироқ рус қўшинлари уларни орқага суриб юборган. Роговнинг таъкидлашича, асосий жанглар Новодаровка, Ровнопол ва Времевка аҳоли пунктлари яқинида бўлган.
Изоҳ (0)