Ҳафта давомида Ўзбекистон ҳудуди бўйича қуруқ ва иссиқ об-ҳаво бўлиши кутилмоқда, деб хабар берди “Ўзгидромет”.

5–9 июнь кунлари республиканинг барча ҳудудларида ҳаво бир оз булутли бўлади, баъзи жойларда ўзгариб туради, ёғингарчилик кутилмайди. Ҳароратнинг аста-секин кўтарилиши давом этади. Иш ҳафтасининг охирига келиб, кундузи ҳаво 37-40 даражагача, 5–6 июнда республиканинг шимолида, 6–8 июнда жанубда ва чўл ҳудудларда 41-42 даражагача исийди.

Қайд этилишича, бундай ҳарорат июнь ойининг биринчи ўн кунлиги учун меъёрий қийматлардан 4-6 даражага юқоридир. Аммо ушбу даврда бундан ҳам юқори ҳарорат қийматлари кузатилган.

Тоғли ҳудудларда ушбу ҳафтада асосан ёғингарчиликсиз об-ҳаво бўлади, фақат Фарғона водийси билан чегарадош айрим тоғли ҳудудларда бугун куннинг иккинчи ярмида қисқа муддатли ёмғир ёғиши, момақалдироқ бўлиши мумкин.

Республиканинг шимолида, жанубида ва чўл ҳудудларида 7–8 июнда баъзи жойларда шамол 15-20 метр/секундгача кучайиши, айрим жойларда чанг-тўзонлар билан кузатилиши мумкин.

Тошкентда 5–9 июнь кунлари ҳаво кам булутли бўлади. Ҳарорат ҳафта бошида 35-37 даража бўлади, ҳафта охирига келиб, 38-40 даражагача  кўтарилади.

“Ўзгидромет” 5–8 июнь кунлари Эрон ҳудудларидан иссиқ ҳаво кириб келишидан аввалроқ огоҳлантирганди.