“Мактабгача ва мактаб таълими вазирлиги ҳамда унинг тизимидаги ташкилотлар фаолиятини самарали ташкил этиш чора-тадбирлари тўғрисида”ги президент фармони билан Мактабгача ва мактаб таълими вазирлигининг айрим функциялари хусусий секторга берилмоқда.
Ҳужжат билан Мактабгача ва мактаб таълими вазирлигининг, Мактабгача таълим агентлигининг, Ихтисослаштирилган таълим муассасалари агентлигининг ташкилий тузилмалари тасдиқланган.
Шунингдек, вазирлик ва унинг тизимидаги ташкилотларнинг хусусий секторга ўтказилаётган функциялари рўйхати тасдиқланмоқда:
- Давлат мактабгача ва умумий ўрта таълим ташкилотларини кўмир ёқилғисига ўтказиш орқали уларни куз—қиш мавсумида иссиқлик энергияси билан узлуксиз таъминлаш, ушбу муассасаларнинг қозонхоналарни модернизация қилиш, иссиқлик тизимини таъмирлаш ва белгиланган меъёрларда ишлашини таъминлаш функцияларини давлат-хусусий шериклик асосида босқичма-босқич секторга бериш хусусида (2023 йил августгача);
- Умумий ўрта таълим муассасалари ўқитувчилари ва мактабгача таълим ташкилотлари тарбиячилари учун айрим фанлар бўйича малака ошириш курсларини ташкил этиш (2023 йил сентябргача).
Таълим тизимидаги ўзгаришлар
2023/2024-ўқув йилидан бошлаб босқичма-босқич умумий ўрта таълим муассасаларининг 1–4-синфларида ўқувчиларга бошланғич, 5–9-синфларда таянч ҳамда 10–11-синф ўқувчиларининг қизиқиш ва қобилиятига мос бўлган ихтисослашган билимларни беришга йўналтирилган дастур ва ўқув-методик мажмуалар жорий этилиши тўғрисида хабар берилганди.
Бундан ташқари, ўқувчилар билимини баҳолашнинг янги тартиби жорий этилади ва унинг доирасида ўқитувчи томонидан ўқувчиларнинг ўтилган мавзуни амалиётда қўллай билиш, танқидий фикрлаш ва берилган материални таҳлил қила олиш каби кўникмалари баҳоланади. Шунингдек, мактабларни малакали кадрлар билан таъминлаш мақсадида педагогларни сертификатлаш тизими йўлга қўйилади.