Жонли ижро, жўшқин рақс ва ўзбекона тўн-дўппи: Рафет Эл Романнинг Намангандаги концертидан репортаж (видео)

Турк эстрадаси юлдузи Рафет Эл Роман 62-халқаро гуллар фестивали доирасида Наманганда концерт берди. Бу ҳақда “Дарё” мухбири Азизбек Абдувалиев ҳикоя қилмоқда.

Жаҳон миқёсидаги санъаткор биринчи бор Наманганга келгани учун бу концертга қизиқиш катта бўлди.

Томошабинлар қаторида маҳаллий мухлислардан ташқари фестиваль меҳмонлари, вилоятда фаолият олиб бораётган туркиялик мутахассисларни ҳам учратиш мумкин эди.

Концерт олдидан Рафет Эл Роман “Дарё” учун эксклюзив интервью берди.

“Бундан олдин Тошкент ва Самарқандда концерт бергандим, бу гал Наманганга таклиф этишди. Умуман, Ўзбекистонда жуда кўп мухлисларим борлигини биламан. Олдинлари улардан мактублар ҳам олардим. Ҳозир ижтимоий тармоқлар орқали ёзишади, қўшиқларим ҳақида изоҳлар қолдиришади. Бундан, албатта, хурсандман”, — дейди хонанда.

Рафет Эл Роман ўзбек маданияти, тарихи ва адабиёти борасидаги чуқур билимлари билан “Дарё” мухбирини ҳайратга солди.

“Ўзбекистонлик санъаткорларни кузатиб бораман, айримларини шахсан танийман. Буюк тарихингиз, асл адабиётингиз, улуғ ёзувчи ва шоирларингиз бор. Шоирларингиздан бирининг шеърини қўшиқ ҳам қилганман. Бу бизнинг муштарак илдизларимиздан далолат беради. Шу сабаб бир-биримизнинг дардимизни англаймиз, шодлигимизга шерик бўламиз”, — дейди Рафет Эл Роман.

Намангандаги концерт жонли тарзда ўтди. Хонанда мухлислари билан уларга таниш ва севимли бўлиб қолган тароналарни бирга куйлади. Қўшиқлардан бирида Рафет Эл Роман саҳнадан пастга тушиб, стадионда жўшқин рақс ҳам ижро этди.

Концерт давомида Наманган вилояти ҳокими Шавкат Абдураззоқов саҳнага кўтарилди. У хонандага ташриф ва концерт учун миннатдорлик билдирди. Ўзбекона удумларга мувофиқ меҳмонга тўн ва дўппи кийгизиб, белбоғ боғлади.

Наманганда турк эстрадаси юлдузи иштирокидаги илк жонли концерт якунланганидан кейин ҳам мухлислар анчагача тарқалмади. Улар янада кўпроқ қўшиқларни тинглаш, севимли хонандалари билан бирга бўлиш истагида эканлигини пайқаш қийин эмасди.