Вашингтон университети тадқиқотчилари ҳақиқий ҳашаротдек ҳавода айлана оладиган робот-арини яратишди. Бу ҳақда “Правила жизни” хабар берди.
Муҳандислар жамоаси барча йўналишларга уча оладиган, ҳавода муаллақ қотиб турадиган, айлана оладиган, ҳақиқий арилардек “рақсга туша оладиган” дунёдаги илк мини роботни йиғишди.
Келгусида робот-арини ўсимликларни чанглантириш жараёнида, қидирув-қутқарув ишларида, биологик тадқиқотларда ҳамда атроф-муҳитнинг зарари мониторингида ишлатиш режалаштирилган. Роботнинг тана вазни 95 миллиграммни ташкил этади. Ҳақиқий арилар 10 миллиграмм вазнга эгалигини ҳисобга олинса, роботча ўз прототипидан анча оғирроқ.
Робот ҳашарот битта қувватланишда 5 дақиқа давомида уча олади. Шундан сўнг уни қувватлантириш керак бўлади. Робот қувватни ингичка сим орқали олади.
Лойиҳа раҳбари Нестор Перес-Арансибианинг айтишича, бу илм-фан оламида катта ютуқдир. Сабаби тадқиқотчилар 30 йилдан бери ҳақиқийсидек уча оладиган сунъий ҳашаротлар яратиш устида ишлаётган эди.
Изоҳ (0)