Тошкент вилоятининг Янгийўл шаҳридан оқиб ўтувчи каналда чўкиб кетган боланинг жасади бир кун ўтиб топилди. Бу ҳақда Тошкент вилояти Фавқулодда вазиятлар бошқармаси ахборот хизмати раҳбари Рустам Алимов “Дарё”га маълум қилди.
Рустам Алимовнинг айтишича, бошқармага соат 13:10 да Янгийўл шаҳридан оқиб ўтувчи Жўнариқ каналида чўмилмоқчи бўлган 16 ёшли М.И. чўкиб кетгани ҳақида хабар келиб тушган.
“Чўкиб кетган болани топиш учун 3 нафар ғаввос қутқарувчилар жалб қилинди. Натижада 4 июнь куни соат 10:00 ларда боланинг жасади топилди”, — деди ФВБ масъул ходими.
Қўшимча қилинишича, ҳолат тегишли органлар томонидан ўрганилмоқда.
Фарғонада ҳам шу каби ҳолат
Фарғона вилояти Қўштепа туманида 25 май куни мактаб битирувчилари Катта Фарғона каналига чўмилишга борган. Улардан бири чўмилиш вақтида сувдан қайтиб чиқмаган. ФВБ ходимлари томонидан 9 кун давомида қидирув ишлари натижасида унинг жасади 3 июнь куни топилган.
Ўзбекистонда чўкиб кетиш ҳолатлари
Ўзбекистонда 2022 йил ёз мавсумида 142 нафар фуқаро чўкиш билан боғлиқ вазият туфайли вафот этган. Бахтсиз ҳодисалар 51 ҳолатда чўмилиш тақиқланган, рухсат этилмаган, чўмилиш учун шароит бўлмаган, хавфли сув ҳавзаларида чўмилганлик оқибатида, 85 ҳолатда эса эҳтиётсизлик сабаб юзага келган.
Ушбу чўкканларнинг 45,3 фоизи вояга етмаганлар ҳисобига тўғри келади. Эҳтиётсизлик оқибатида юзага келган 85 кишининг чўкиши дарёлар, каналлар ҳамда ариқларнинг устидаги сув, газ, чиқинди оқова сув қувурларидан йўлни қисқартириш мақсадида кўприк сифатида фойдаланиб ўтишлари ҳамда сув ҳавзалари қирғоқ бўйларида хавфсизлик қоидаларига риоя этмагани сабабли юз берган.
Ҳолат юзасидан ҳозирда терговга қадар текширув ҳаракатлари давом эттирилмоқда, натижаси юзасидан қонуний қарор қабул қилиниши таъминланади.