Анқарада 3 июнь куни Туркия президенти инаугурацияси маросими бўлиб ўтди. Унда Шавкат Мирзиёев ҳам иштирок этди.
Ражаб Тоййиб Эрдўғон 28 майдаги сайловда Туркия президенти этиб қайта сайланганди.
Президент матбуот хизматининг қайд этишича, тадбирда дунёнинг 80 га яқин мамлакатлари вакиллари — давлат ва ҳукумат раҳбарлари, парламент спикерлари, юқори даражадаги расмий шахслар ҳамда Туркий давлатлар ташкилоти, Шимолий Атлантика шартномаси ташкилоти, Ислом ҳамкорлик ташкилоти ва бошқа нуфузли халқаро тузилмалар раҳбарлари қатнашди.
Маросим чоғида Шавкат Мирзиёев Туркия етакчисини сайловдаги ғалабаси билан яна бир бор қутлаб, лавозимга киришгани билан табриклади, Туркия халқига катта муваффақиятлар ва фаровонлик тилади.
Тадбир доирасида давлат раҳбари маросимга таклиф этилган мамлакатлар етакчилари ва халқаро ташкилотлар раҳбарлари билан фикр алмашди.
Шу билан Анқарага ташриф дастури якунига етиб, президент Тошкентга жўнаб кетди.
Изоҳ (0)