Бухоро вилояти Қоракўл туманида истеъмолга яроқсиз гўшт сақлаб келганлар қўлга тушди. Бу ҳақда ИИВ ахборот хизмати хабар берди.
Унга кўра, ушбу ҳолатлар вилоят ИИБ Карантин тадбирларини таъминлаш гуруҳи ва Қоракўл тумани ИИБ ходимлари ҳамкорлигида туман ҳудудида олиб борилган тадбир давомида аниқланган. “Шакарчи” маҳалласида яшовчи 1985 йилда туғилган Р.А. исмли шахс томонидан 205 кг ҳамда “Дарғали” маҳалласида яшовчи 1989 йилда туғилган Т.А. исмли шахс томонидан 153 кг қўлбола усулда тайёрланган музлатгичда келиб чиқиши номаълум ҳайвонга мансуб бўлган гўшт сақланиб келинаётгани маълум бўлган.
Ҳолат бўйича вилоят Ҳайвонлар касалликлари ташхиси ва озиқ-овқат маҳсулотлари хавфсизлиги давлат маркази ветеринария-санитария экспертиза, микробиология ва озиқ-овқат маҳсулотлари хавфсизлиги лабораториясининг тегишли хулосасига кўра ушбу гўшт ва гўшт маҳсулотлари истеъмолга яроқсизлиги аниқланган.