Ўзбекистонда Ҳаж мавсуми бошланиб, 3 июндан 4 июнга ўтар кечаси соат 02:00 да 240 нафар зиёратчи бўлган илк рейс Тошкентдан Мадинага учиб кетди, деб хабар бермоқда Uzbekistan Airports.

Уларни кузатиш учун Президент маслаҳатчиси, Дин ишлари бўйича қўмита ва Ўзбекистон мусулмонлари идораси раҳбарияти ҳам Тошкент халқаро аэропортида бўлди.

4—19 июнь кунлари Ўзбекистоннинг 10 та шаҳридан Мадинага парвозлар амалга оширилади. Бу йил энг кўп зиёратчилар Тошкентдан ҳажга боради — 16 рейсда 5575 нафар йўловчи ташилади. Намангандан 14 та, Фарғонадан 6 та, Самарқанддан 4 та, Бухоро, Урганч, Қарши ва Термиздан 3 тадан рейс, шунингдек, зиёратчилар билан 2 та рейс Навоийдан, Нукусдан эса 1 та рейс амалга оширилади. Ўзбекистондан жами 15130 нафар зиёратчи ҳаж зиёратини адо этади.

Авиакомпания матбуот хизматининг маълум қилишича, бу йил ҳаж бошланиши билан Тошкент аэропортида  қўшимча шарт-шароит ва қулайликлар яратилди — жўнаб кетиш залининг стерил зонасида бир вақтнинг ўзида 80 ва 60 кишини сиғдира оладиган иккита, эркаклар ва аёллар учун намозхона очилди. Бундан ташқари, ибодатхоналар олдида энди таҳорат олиш учун — эркаклар ва аёллар учун ҳам махсус хоналар мавжуд. Шу билан бирга, ҳожатхоналарнинг катта блоки фойдаланишга топширилди.

Мазкур рейслар давомида пойтахт аэропорти эстакадасида ҳаракатланиш вақтинча чекланади, терминалга кириш фақат йўловчилар учун очиқ бўлади. Шунингдек, Ўзбекистон мусулмонлари идораси зиёратчиларнинг яқинларига терминалда тиқилинч ҳолатни ва аэропорт ён атрофида тирбандликларни олдини олиш учун аэропортга келмасдан, ўз яқинларини масжидлардан кузатишни тавсия қилади.