Сербия пойтахтида кетма-кет бешинчи ҳафта ҳукуматга қарши намойишлар ўтказилмоқда. Бунга май ойи бошида бўлиб ўтган оммавий отишма ҳолатлари сабаб бўлган.
Белграддаги намойишда минглаб одамлар иштирок этди. Намойишчилар зўравонликка қарши норозилик билдиришди. Улар президент Александр Вучич, ички ишлар вазири Братислав Гашич ва Хавфсизлик ва ахборот агентлиги раҳбари Александр Вулиннинг истеъфога чиқишини, шунингдек, ҳукуматпараст таблоидлар ва телеканалларнинг ёпишни талаб қилишмоқда.
Намойишчилар Сербия пойтахтининг марказий кўчалари бўйлаб президент маъмурияти биносигача боришди.
Намойишлар фожиали воқеалардан бир ой ўтиб бўлиб ўтмоқда. 3 май куни ўсмир йигит Белград мактабларидан бирида ўт очди. Бир кун ўтгач, бошқа бир йигит Младеновац муниципалитети яқинида кўчада кетаётган одамларни отиб ташлади. Оқибатда жами 18 нафар инсон ҳалок бўлди.
Намойишчилар Вучични барча давлат муассасалари устидан назоратни ноқонуний эгаллаб олганликда айбламоқда. Президент буни рад этиб, мухолифат уни куч билан ағдармоқчи эканини айтяпти. Вучич намойишларни “сиёсий найранг” деб атади.
Президент истеъфога чиқишини рад этди.
Изоҳ (0)