Венгрия ҳукумати Украинада ўт очишни тўхтатишга чақирувчи видеоролик эълон қилди, унда Украина харитаси Қримсиз кўрсатилган. “Страна” украин нашри бунга эътибор қаратди.

“Ўн минглаб болалар етим қолди, юз минглаб уйлар вайрон бўлди, ўн миллиондан ортиқ одам ўз уйини ташлаб кетишга мажбур бўлди, аммо уруш давом этмоқда ва ҳадемай, глобал тус олиши мумкин. Урушни бас қилинг, фақат ўт очишни тўхтатиш вайронагарчиликка чек қўйиши мумкин, фақат тинч музокаралар одамлар ҳаётини сақлаб қолиши мумкин. Тинчлик вақти келди”, — дейилади видеода.

Роликда ушбу сўзлар фонида болалар ва аёллар, урушдан вайрон бўлган шаҳарлар тасвири кўрсатилган. Урушнинг глобал можарога айланиши эҳтимоли ҳақида гап кетганда, экранда Украина харитаси пайдо бўлади, аммо у Россия томонидан аннексия қилинган Қрим ҳудудини ўз ичига олмайди.

Расмий Венгрия Қримнинг аннексия қилинишини қонуний деб тан олмаган эди.

Июнь ойи бошида Венгрия бош вазири Виктор Орбан Украина Қуролли кучларининг қарши ҳужумининг олдини олишга ва “қонли қирғин”га йўл қўймаслик учун Москва ва Киев ўртасида музокаралар бошлашга чақирди.

Украина президент офиси раҳбарининг маслаҳатчиси Михаил Подоляк Орбаннинг баёнотига жавоб бериб, унга Владимир Путинни бутун Украинадан рус қўшинларини олиб чиқишга кўндиришни таклиф қилди.

Ўз навбатида, Россия президентининг матбуот котиби Дмитрий Песков Кремль Киев билан тинч мулоқот учун зарур шароит кўрмаётганини айтди.