Тошкент шаҳрининг Чилонзор туманида жойлашган мактабларнинг бирида юз берган жанжал бўйича жиноят иши қўзғатилди. Бу ҳақда пойтахт ИИББ ахборот хизмати хабар берди.

Қайд этилишича, 23 май куни тахминан соат 11:00 ларда Чилонзор туманида жойлашган мактаблардан бирининг олдида 10-синф ўқувчилари А.Х. ва Д.Ў. шу мактабнинг 9-синф ўқувчилари Ш.Э. ва И.Т. билан ўзаро келиб чиққан келишмовчилик сабабли жанжаллашган.

Жанжал оқибатида Ш.Э. ва И.Т. тан жароҳати олиб, шифохонага ётқизилган. Ўтказилган суд-тиббий экспертизанинг хулосасига кўра, жабрланувчиларга соғлиқни қисқа муддатга бузилишига олиб келган енгил тан жароҳати етказилгани аниқланган.

Мазкур ҳолат юзасидан Чилонзор тумани ИИО ФМБ ҳузуридаги Тергов бўлими томонидан Жиноят кодексининг 109-моддаси (қасддан баданга енгил шикаст етказиш) 2-қисми билан жиноят иши қўзғатилган. Тергов давом этмоқда.   

Ўқувчилар ўртасида муштлашувлар

2022 йилнинг октябрида ижтимоий тармоқларда Наманганнинг Косонсой туманида мактаб ўқувчилари муштлашуви акс этган тасвирлар тарқалганди. Ноябрда эса Тошкентда ўқувчилар футболдаги жанжал сабаб муштлашиб кетган эди. Кейинроқ пойтахт ИИББ воқеага муносабат билдириб, мазкур ҳолат юзасидан Янгиҳаёт тумани ИИО ФМБ томонидан текширув ўтказилаётганини маълум қилган.

Шунингдек, Тошкентда мактаб ўқувчилари “Америка киносига тақлид қилиб” муштлашув уюштиргани, Хоразм вилояти Урганч туманида жойлашган икки мактаб ўқувчиси ўртасида жанжал содир бўлгани тўғрисида хабар берилганди.