UzAuto Motors матбуот хизмати ижтимоий тармоқларда июлдан бошлаб Chevrolet Cobalt ва Gentra нархлари ошиши айтилган хабарларга муносабат билдирди.
“UzAuto Motors бу бўйича ҳеч қандай маълумот тақдим қилмаган. Ушбу маълумотлар ҳеч қандай асосга эга эмас ва ёлғонлигини таъкидлаб ўтиш керак”, — дейилади муносабатда.
Компания турли саҳифа эгаларини одамлар эътиборини тортиш учун улар қизиққан йўналишда бирор-бир фактга асосланмаган ахборотни тарқатмасликни сўраган.
“Компания ва маҳсулотлар нархи ҳақида расмий саҳифаларимиз орқали билиб олишингиз мумкин”, — дея таъкидланади хабарда.
UzAuto Motors май ойи бошида Chevrolet Onix ва Tracker автомобиллари сотувини тўхтатганди. Компания 2022 йилда ҳамёнбоп моделлардан Spark, Nexia, Cobalt ва Lacetti автомобиллари сотувини тўхтатиб, Onix ва Tracker учун шартномалар тузишни бошлаган. Бироқ 2023 йил май ойи бошидан нархи 207 миллион сўмлик Onix ва 211 миллион сўмлик Tracker сотуви тўхтаб қолган. 25 майдан бошлаб UzAuto Motors Tracker ва Onix автомобиль моделларининг янгиланган комплектациялари учун шартнома беришни бошлади.
Изоҳ (0)