АҚШ президенти Жо Байден 1 июнь куни Колорадодаги Ҳарбий-ҳаво кучлари академиясида диплом топшириш маросими вақтида саҳнада йиқилиб тушди, деб хабар бермоқда Associated Press.
Байден Колорадо-Спрингс шаҳрида битирувчиларни табриклаб, ўз ўриндиғига қайтаётган вақтда саҳнада қоқилиб кетди ва йиқилди. Унга ҳаво кучлари зобити ва АҚШ махфий хизматининг икки ходими ёрдам берди.
Томошабинлар, жумладан, саҳнадаги расмий делегациянинг баъзи аъзолари АҚШ тарихидаги энг кекса президент, 80 ёшли Байденнинг ҳаракатларини ташвишланиб кузатган.
“Қумли қопга қоқилиб кетдим”, — деб журналистларга ҳолатни кулиб тушунтирди президент Оқ уйга қайтаётганда. Саҳнада Байден ва бошқа маърузачилар ишлатадиган телесуфлёр учун иккита кичик қумли қоплар ётқизилганди.
АҚШ собиқ президенти Дональд Трамп Байденнинг йиқилишига муносабат билдирди.
“Ҳарбий-ҳаво кучлари академиясининг битирувидами? Нима, у йиқилдими? Ўзига зарар етказмаган, деб умид қиламан. Лекин буниси ошиб тушди. У бир оз эҳтиёткор бўлиши керак, шундаймасми?”, — деди у.
Изоҳ (0)