“Эчкиларни машинага қиёсласак, оддийлари Tico, меники — Malibu эчки”. Бухоролик чорвадор 20 минг долларлик жониворлари ҳақида

Тошкент вилояти Бўстонлиқ туманида 27 май куни Ўзбекистонда илк бор наслли эчкилар кўргазмаси бўлиб ўтди. Унда республиканинг турли ҳудудларидан келган чорвадорлар фуқароларни камёб, нархи 20 минг долларгача бўлган эчки зотлари билан таништириб, ўзаро тажриба алмашди, дея хабар бермоқда “Дарё” мухбири.

Бухоролик чорвадор Ашур Шароповнинг айтишича, эчкичилик соҳасига кириб келишига набирасининг соғлиғидаги ўзгариш сабаб бўлган.

“Эчкичилик соҳасига қизиқишим 2013 йилда бошланган. Набирамда сут танқислиги юзага келгач, табиий маҳсулот билан таъминлаш мақсадида ўзимиз жайдари эчкилардан сотиб олдик. Аста-секинлик билан интернет орқали сифатли эчкилардан ола бошладик, ҳозир Россия, Ҳиндистон, Покистондан келтирилган англанубин, камори, гулаби, битал, макичини каби эчки турларимиз бор. Бизнинг асосий йўналишимиз — сут”, — дейди у.

Ашур Шаропов боқадиган эчкиларнинг бозордаги нархи 5 минг доллардан бошланиб, 20 минг долларгача боради, аммо у эчкиларни сотмоқчи эмас.

“Жаҳон бозорида бу эчкиларнинг нархи 5—10 минг доллардан бошланади. Аслида булар бебаҳо, лекин бир боши 20 минг долларгача туради. Англанубин туримиз учун бу нарх ҳам арзон, бебаҳо дейман. Агар эчкиларни машинага қиёсласак, оддийлари Tico ёки Damas, англанубин эса Malibu ёки Captiva! Ҳозирча умуман сотганимиз йўқ, мақсадимиз — эчкиларнинг сонини 100—150 тагача кўпайтириш”, — дея тушунтирди чорвадор.

Унинг таъкидлашича, эчкилар — жуда баракали жонивор.

“Эчки жуда тез кўпаяди, бир туғганда 4 талаб болалайди. Биттаси 5 йилда 30—40 бошга кўпайиб кетади. Бизнинг устун томонимиз шундаки, бирорта ҳам тайёр эчкини олиб келмаганмиз, ҳаммаси майда майда, ўзимиз меҳр бериб катта қилганмиз. Бу эчкилар иссиқ ўлкалардан келган, совуқдан қўрқади. Ёз кунларида сояда жон сақлайди, бунда ҳеч қандай муаммо йўқ. Асосийси — қишда жонини сақласангиз бўлгани, чунки уларда юнг йўқ”, — дея қўшимча қилди Ашур Шаропов.