Машҳур турк сериаллари ва улардаги томошабинлар меҳрига сазовор бўлган жуфтликлар (фото)

Турк сериалларининг сюжети, актёрлар маҳорати ҳар қандай томошабин эътиборини ўзига қаратади. Улардаги воқеалар ривожи, ҳақиқийдек тасвирланган туйғулар, муносабатлар ҳам алоҳида эътирофга лойиқ. Қуйида томошабинлар қалбидан жой олган машҳур турк сериалларидаги жуфтликлар ҳақида маълумот берилади.

Серкан ва Эда — “Эшигимни қоқ”

Эда — ландшафт дизайнери бўлишни орзу қиладиган истеъдодли флорист. Бироқ у машҳур архитектор Серканнинг айби билан ўқиш грантидан маҳрум бўлиб, холасининг гул дўконида ишлайди. Эда ҳеч бир ишда таслим бўлишни ёқтирмайди. Эда Серкан билан боғланиб, унга ўзгача контракт тузишни таклиф қилади. Шундан сўнг Эда ўз стипендиясининг қайтарилишини кутади. Кейинчалик жуфтликнинг ўртасида илиқ муносабатлар пайдо бўлади.  Ушбу лойиҳада Эда ролини Ҳанде Эрчел, Серкан образини эса Керем Бурсин гавдалантирган.

Экрандаги муносабатлар ҳақиқий ҳаётга ҳам кўчди. Суратга олиш жараёнлари давомида бош рол ижрочилари ўртасида илиқ муносабатлар бошлангани ҳақида миш-мишлар тарқалди. Сериалнинг суратга олиш жараёнлари якунлангач, уларнинг муносабатлари пиар экани маълум бўлди. Бироқ жутфтликнинг энг содиқ мухлислари уларнинг муносабатлари яна тикланишига ишонади.

Мажит ва Нериман (“Истанбулнинг икки юзи”)

Нериман Истанбулдаги қашшоқ маҳаллаларнинг бирида яшайди. У ёшлигида онасидан айрилади, отаси ва холаси қўлида тарбия олади. У болалигидан таниган яқин инсони Шинаси билан турмуш қурмоқчи бўлади. Бу вақтда бадавлат ота-онанинг ўғли Мажит отасининг васиятини бажариб, унинг дўстининг қизига уйланишга ҳозирлик кўради. Йигит Нериман билан тасодифан зиёфатда учрашиб қолади ва уларнинг ўртасида муҳаббат пайдо бўлади. Ушбу сериалда Нериман образини Неслиҳан Атагул, Мажит образини  Кадир Доғулу ижро этган. Неслиҳан Бурак Ўзчивитнинг севгилиси ролини ўйнаган “Севги изтироби” сериалини суратга олиш жараёни давом этаётган вақтда Кадир билан турмуш қурди. Миш-мишларга кўра, “Севги изтироби” сериалини суратга олиш жараёнлари вақтида Кадир рафиқасини партнёридан жуда қизғанган. Айрим саҳналарда ижодкорлар Бурак ва Неслиҳанни алоҳида суратга олиши керак бўлган, кейин эса монтаж пайтида улар кадрга “йиғилган”.

Камрон ва Фериде — “Чолиқуши”

Сериалда бош қаҳрамон Фериде холаси ва унинг ўғли Камрон билан бирга яшайди ва бирданига қариндошини яхши кўриб қолади. Бу сирдан бошқалар ҳам хабар топади. Сериалда Фериде образини Фаҳрие Эвжен, Камрон ролини эса Бурак Ўзчивит ижро этган. Айнан “Чолиқуши” фильмининг суратга олиш жараёнларида у турмуш ўртоғи Фаҳрие билан танишди. Шундан кейин актёрлар орасидаги муносабатлар ҳақида миш-мишлар тарқалди. Бу пайтда Бурак Ўзчивит бошқасига унаштирилган эди, унинг партнёри эса оғир дамларни бошдан кечираётган эди. Орадан вақт ўтиб жуфтлик “Севги сенга ўхшайди” телесериалида яна бирга суратга тушди ва шундан кейин улар яқин муносабатда эканини оммадан яширмади.

Амир ва Зайнаб — “Севги изтироби”

Сериалда катта бизнесменнинг қизи Ниҳон автобусда тасодифан  оддий оиладан бўлган талаба йигит билан учрашиб қолади. Қизнинг қариндошлари Камол билан муносабатларига қарши бўлади, бироқ Ниҳон у билан бирга бўлиш учун ҳамма нарсага тайёр туради. Бироқ, сериалда бошқа қаҳрамонлар ҳам бор, Ниҳанга ошиқ бўлган Амир ўз мақсадига эришишда Камолнинг синглиси Зайнабдан фойдаланади. Машҳур турк актрисаси Ҳазал Филиз Кучуккосе сериалда Зайнаб ролини, Каан Урганжиўғлу эса Амир ролини гавдалантирган.

Бу ҳақиқатан ҳам Неслиҳан Атагулнинг сериалдаги бахтли муносабатларига таъсир қилган сериал. Сериалдаги бош рол ижрочиларнинг муҳаббати кўплаб томошабинларнинг эътиборига тушган, бироқ уларнинг атрофидаги бошқа қаҳрамонлар ҳам бундан четда қолмаган. Сериалда Зайнаб Амирнинг севгиси учун узоқ вақт Ниҳон билан курашиб, ҳатто ундан ҳомиладор бўлиб, турмушга чиқади, бироқ охир-оқибат фарзандидан ҳам, турмуш ўртоғидан ҳам айрилиб қолади. Амир ҳақиқатан ҳам қиздан ўз мақсадлари йўлида фойдаланади. Умуман олганда, дуэт томошабинларнинг ишончини қозонди. Каан ва Хазал сериалнинг суратга олиш жараёнларида дўст бўлиб қолди, актёрлар бирга тушган суратларини ижтимоий тармоққа  жойлади.

Жан ва Санем — “Эрта учган қуш”

Лойиҳада гўзал Санем нуфузли реклама агентлигига ишга киради. У тезда корпоратив интригаларга тўла офис муҳитига киришиб кетади. Шундан кейин компания президентининг ўғли Жан унга эътибор қаратади. Лойиҳада бош ролларни Демет Ўздемир ва Жан Яман ижро этган. Жуфтлик муносабатларини экранда шу қадар ишонарли тарзда ижро этдики, журналистлар улар ўртасидаги муносабатлардан шубҳаланди. Бироқ, актёрлар атрофдагиларга ўртасида фақат дўстлик муносабатлари борлигига ишонтириб, ҳамма миш-мишни рад этди. Бу рол Жан Яманга 2018 йилда нуфузли “Олтин капалак” мукофотини қўлга киритишига ёрдам берди.

Аяз ва Ойку — “Гилос мавсуми”

Бош қаҳрамон Ойку Мете исмли йигитни севиб қолади, бироқ у буни сезмайди. Орадан кўп ўтмай у Мете билан ишлаётган Аяз билан учрашади ва бирданига бу йигит унинг ҳақиқий тақдири эканини тушуниб етади. Лойиҳада Ойку ролини Ўзге Гурел, Аяз образини эса актёр Серкан Чаёғлу ижро этган.

“Гилос мавсуми” Ўзге Гурелнинг карьерасидаги ютуққа айланди. Актриса лойиҳага тасодифан қўшилган. Ўзге бу пайтда бошқа лойиҳа кастингида қатнашаётган эди, бироқ у дўстларининг маслаҳати билан бу сериалда ҳам ўзини синаб кўришга қарор қилди. Натижада, сериал Туркиядаги энг машҳур лойиҳалардан бирига айланди. Шунингдек, бу Италияда намойиш этилган биринчи турк сериалига айланди. Суратга олиш жараёнида Ўзг энг яқин дўстларидан бирига айланган актриса Фатма Топташ билан учрашди.

Ферит ва Назли — “Тўлин ой”

Назли ўз ресторанида ошпаз бўлишни орзу қилади. Бироқ ўша пайтда у пул топиш илинжида юрган талаба бўлади. У ўта талабчан, инжиқ ва севгидан узоқ вақтдан бери ҳафсаласи пир бўлган бадавлат тадбиркор Феритга шахсий ошпаз бўлиб ишга киради. Сериалда бош ролларни Ўзге Гурел ва Жан Яман ижро этган. Сериал ҳозирда энг машҳур турк юлдузларини бирлаштириб, турк киноси мухлисларининг узоқ йиллик орзусини амалга оширди. Жуфтликнинг муносабатлари сериалдан ҳақиқий ҳаётга кўчди.