Тошкент шаҳар Мирзо Улуғбек туманида 24 май куни кўп қаватли уйдаги хонадон балконига илинган Украина байроғи махсус кран орқали олиб ташлангани хабар қилинганди. Шаҳар Ички ишлар бош бошқармаси матбуот хизмати “Дарё”га ҳолат юзасидан изоҳ берди.

Хонадон эгасининг айтишича, ўша куни у мамлакатда бўлмаган. Ҳолат содир бўлишидан бир неча соат аввал ўзини Мирзо Улуғбек тумани ИИБ ходими Мурод деб таништирган шахс қўнғироқ қилиб, хонадонда бўлган байроқ олиб ташланишини айтган. Сабаби сўралганда эса “Келсангиз, тушунтирамиз, бизда олиб ташлашга буйруқ бор”, дея жавоб берган.

“Дарё” ўзини ИИБ жиноят-қидирув бўлимидан деб таништирган шахс ростдан ҳам ички ишлар ходими экани ҳамда унга буйруқ ким томонидан, нима мақсадда берилганига аниқлик киритиш мақсадида Тошкент шаҳар Ички ишлар бош бошқармаси матбуот хизмати раҳбари Нилуфар Мадиева билан боғланди.

Унинг айтишича, хонадон эгасига ходимларнинг ҳаракатидан норози бўлган тақдирда, тегишли органларга шикоят қилиш бўйича тушунтириш берилган:

“Фуқарога тушунтирдик, агар ички ишлар органлари ходимларининг ҳаракатидан норози бўлса, юқори турувчи органларга, хусусан, прокуратурага шикоят билан мурожаат қилиши мумкин”.

Мухбирнинг “Байроқни олиб ташлаш бўйича буйруқни ким, нима учун берган эди?”, деган саволига жавоб берилмади.

“Бу талаб қонуний ёки ноқонуний бўлганини биз ҳал қилмаймиз, ходимларнинг ҳаракатига прокуратура баҳо беради. Фуқаро шикоят билан мурожаат қилса, шунда текширув ўтказилади”, — дея айтиб ўтди Нилуфар Мадиева.

Юрист блогер Баҳодир Аҳмедовнинг ёзишича, фуқароларнинг эркинлигини чеклаш ИИБ ходимларининг хизмат интизоми бузилишига олиб келади.

“Украина байроғини илишга бирорта қонуний тақиқ борми? Аниқ норматив-ҳуқуқий ҳужжатнинг аниқ нормаси... Фуқароларнинг ҳуқуқ ва эркинлигини бузиш эса ИИБ ходими томонидан ПҚ-10 Ички ишлар органлари ходимларининг касбий маданият ва хизмат интизоми кодекси 54-бандига асосан интизомни қўпол равишда бузишдир.

Украина байроғи — бу урушга қарши протест. Аксинча бўлса жавобгарлик бўларди — урушни тарғиб қилиш жиноят (ЖК 150-модда). Украина бу бир халқаро ҳуқуқ субъекти бўлган давлат. Унинг байроғини илишда нотўғри нарса кўрмаяпман”, — дея таъкидлаган у.