Ҳиндистонлик амалдор селфи қилаётганида тушириб юборган смартфонини олиш учун сув омборини қуритишни буюрди

Ҳиндистоннинг Чхаттисгарх штатида озиқ-овқат маҳсулотлари бўйича ҳукумат бўлими ходими Ражеш Вишвас Samsung телефонини тушириб юборганидан сўнг, ўша сув омборини қуритишни буюрди, деб ёзади Associated Press.

Вишвас ўшанда дўстлари билан Херкатта тўғонида пикникка борган эди. У телефонини сув омборига селфи олаётганида тушириб юборган.

Аввалига амалдор маҳаллий дайверлардан сув тагига шўнғиб, смартфонни топишни буюрган. У қўл остидагиларга телефонида ҳукуматга тегишли махфий маълумотлар борлигини айтган. Бироқ сувга шўнғишга муваффақиятсиз уринишлардан сўнг, у дизел насослари ёрдамида сувни сўриб олишга кўрсатма берган.

Натижада уч кун ичида сув омборидан 2 миллион тоннадан кўпроқ сув чиқариб ташланган. Маҳаллий ОАВнинг маълумотларига кўра, бу сув билан 1500 акр ер майдонидаги қишлоқ хўжалик экинларини суғориш мумкин эди.

Кейинроқ маҳаллий аҳолининг шикоятига кўра воқеа жойига ирригация ва сув ресурслари департаментидан амалдор етиб келиб, сувни омбордан чиқариб ташлаш жараёнини тўхтатди.
Сув тубига тушиб кетган смартфон топилган, бироқ қурилмани ёқишнинг имкони бўлмаган.

Вишвас сув омборидаги сув экинларни суғоришга яроқсиз эканлиги ҳамда сувни насос ёрдамида сиқиб чиқариш ҳақида юқори лавозимли бошқа амалдордан оғзаки рухсат олганини айтган. Вишвас сув ресурсларини исроф қилганликда айбланди ҳамда лавозимидан четлаштирилди.