Тошкент вилояти Янгийўл туманида хотира бюстини уриб, ноўрин ҳаракат қилган болаларнинг ота-оналарига чора кўрилди. Бу ҳақда вилоят ИИББ ахборот хизмати хабар берди.
Унга кўра, 28 май куни Янгийўл туманида 27-мактабнинг 3 нафар 6-синф ўқувчилари туман марказида жойлашган, Иккинчи жаҳон уруши қатнашчилари хотирасига ўрнатилган бюстлардан бирини уриб, ноўрин ҳаракатлар қилган. Болалар ушбу ҳолат видеосини Instagram ижтимоий тармоғига жойлаштирган.
Видео интернет фойдаланувчилари орасида кўплаб эътироз ва муҳокамаларга сабаб бўлди. Туман ИИБ ходимлари томонидан ўқувчилар, уларнинг ота-онаси, мактаб ва маҳалла масъуллари иштирокида профилактик суҳбат ўтказилди. Унда ўқувчиларга вилоят фахри бўлган бундай шахслар хотирасига ҳурматсизлик қилиш нотўғри эканлиги тушунтирилди.
Ушбу ҳолатда шахслар вояга етмагани инобатга олиниб, Маъмурий жавобгарлик тўғрисидаги кодекснинг 47-моддаси 1-қисмига асосан, уларнинг ота-оналарига нисбатан маъмурий чора кўрилди.
