Тошкент шаҳри Чилонзор туманида 21 ёшли йигит терговдан қочиш мақсадида ҳожатхонадан пастга сакраб, вафот этди. Бу ҳақда ИИВ матбуот котиби маълум қилди. 

Унга кўра, 22 май куни тонгги соат 04:30 ларда Чилонзор туманидаги йўл-патрул хизмати масканида хизмат олиб бораётган ЙПХ инспекторлари томонидан Gentra русумли транспорт воситаси тўхтатилган. Мазкур автомобиль йўловчиси 2002 йилда туғилган Х.Т. ўз хатти-ҳаракатлари билан ходимларда шубҳа уйғотгани сабабли холислар иштирокида текширилган ва унинг ёнидан ўткир ҳидли тўқ жигарранг модда борлиги аниқланиб, расмийлаштириб олинган. Х.Т. ва тўпланган ҳужжатлар Чилонзор тумани ИИО ФМБга топширилган.

Ўтказилган судга оид кимёвий экспертиза хулосасига кўра, Х.Т.нинг ёнидан топилган модда 53,52 граммлик гашиш гиёҳвандлик моддаси экани аниқланган. 

Мазкур ҳолат юзасидан Х.Т.га нисбатан Жиноят кодексининг 273-моддаси (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек, уларни қонунга хилоф равишда ўтказиш) асосида жиноят иши қўзғатилган.

Шу куни соат 18:50 ларда Х.Т. Чилонзор тумани ИИО ФМБдаги 4-қаватда жойлашган хизмат хонасига олиб кетилаётган вақтда ҳожатхонага киришини сўраган. Х.Т. 4-қаватда жойлашган ҳожатхонага киргандан сўнг, терговдан қочиб яшириниш мақсадида ҳожатхона деразасидан пастга сакраши натижасида бош ва тана қисмидан турли жароҳатлар олган. Мазкур ҳолат бинога ўрнатилган видеоёзув мосламаларида қайд этилган.

Туман ички ишлар ходимлари Х.Т.га зудлик билан тез тиббий ёрдам кўрсатилишини таъминлаш мақсадида РШТЁИМга олиб борилиб, унга бош мия ёпиқ жароҳати, бош мия лат ейиши, бош суягини синиши, тана аъзолари гематомаси ташхиси қўйилган. 29 май куни Х.Т. касалхонада вафот этган. Ҳолат юзасидан Чилонзор тумани прокуратураси томонидан терговга қадар текширув ўтказилмоқда.