Ўзбекистонда телекоммуникациялар соҳасида айрим фаолият турларини амалга оширганлик учун давлат божи миқдорлари мақбуллаштирилади. Бу ҳақда Сенат матбуот хизмати хабар берди.
Сенатнинг Ахборот сиёсати ва давлат органларида очиқликни таъминлаш масалалари қўмитасида Сенатнинг навбатдаги ялпи мажлиси кун тартиби доирасида кўриб чиқиладиган масалалар тегишли давлат органлари ва ташкилотлар масъуллари, экспертлар иштирокида дастлабки тарзда муҳокама қилинган.
Хусусан, “Телекоммуникациялар соҳасида айрим фаолият турларини амалга оширганлик учун давлат божи миқдорлари мақбуллаштирилиши муносабати билан “Давлат божи тўғрисида”ги Ўзбекистон Республикаси Қонунига ўзгартириш ва қўшимчалар киритиш ҳақида”ги қонун муҳокама қилинган.
Ушбу қонун билан теле ва радиоканалларга, шунингдек, уяли алоқа виртуал операторларига ўз фаолиятларини амалга оширганлари учун тўлайдиган давлат божи миқдорлари камайтирилиб, уларга кенг имкониятлар яратиб берилмоқда.
Жумладан, уяли алоқа виртуал операторлари (провайдерлар) томонидан радиотелефон (уяли) алоқа тармоқлари хизматларини кўрсатганлик учун тўланадиган йиллик давлат божи миқдори ҳам камайтирилмоқда.
Шунингдек, қонун билан теле ва радиоканаллар томонидан телерадиоэшиттиришларни тарқатиш (намойиш қилиш) тармоқларини лойиҳалаштирганлик, қурганлик, улардан фойдаланганлик ва уларнинг хизматлар кўрсатганлиги учун тўланадиган давлат божи миқдорлари илгариги миқдорларга нисбатан мос равишда 50 фоизга камайтирилмоқда.
Бундан ташқари, қонундаги ушбу ўзгартиришларга асосан эндиликда теле ва радиоканаллар томонидан юқоридаги фаолият турлари учун тўланадиган давлат божини йилнинг ҳар чораги учун тенг миқдорларда бўлган ҳолда тўлашга имконият яратиб берилмоқда.
Қўмита аъзоларининг таъкидлашича, ушбу имкониятлар келажакда алоқа ҳамда теле ва радиоканаллар орқали эфирга узатилаётган медиа маҳсулотлари сифатини яхшилашга хизмат қилади.
Изоҳ (0)