“ПСЖ” ҳужумчиси Килиан Мбаппе 2022/23 йилги мавсум якунига кўра, Лига 1 нинг энг яхши футболчиси деб топилди. 

Мбаппе ушбу совринни кетма-кет тўртинчи бор қўлга киритмоқда. Килиан 2019, 2021 ва 2022 йилларда ҳам чемпионатнинг энг яхши футболчиси деб топилганди. 2020 йил коронавирус пандемияси туфайли соврин топширилмаган. Франция терма жамоаси бош мураббийи Дидье Дешам ҳужумчига совринни топширди. 

24 ёшли футболчидан ташқари Лига 1 нинг энг яхши футболчиси бўлиш учун Лионель Месси (“ПСЖ”), Жонатан Девид (“Лилль”), Секо Фофана ва Лои Oпeнда (иккаласи ҳам “Ланс”) кураш олиб борганди. 

Мбаппе жорий мавсум Франция чемпионатида 33 та ўйинда иштирок этиб, 28 та гол ва 5 та голли узатмага муаллифлик қилди. Тўпурарлар рўйхатида Килиан етакчилик қилмоқда. “Лион” ҳужумчиси Александр Ляказетт 27 та гол билан ундан кейинги ўриндан жой олган. Францияда мавсум тугашига яна битта тур қолди.