Озарбайжон ва Арманистон ўртасидаги чегарани делимитация қилиш Боку айтган шартларга асосланиши керак, деди Озарбайжон президенти Илҳом Алиев. Лочин вилояти аҳолиси билан учрашувда у Нахчивонга йўл очилиши, Қорабоғда ҳалигача бўлиб турган арман армияси вакиллари у ердан олиб чиқилиши кераклигини эслатди, деб ёзмоқда “Haqqin.az”.

Алиевнинг айтишича, бу шартлар бажарилган тақдирдагина “юмшатишлар” ва амнистия ҳақида гап бўлиши мумкин.

“Барчага яхши маълумки, бугунги кунда ўша ҳудудда исталган операцияни ўтказиш имконияти мавжуд”, — деди Озарбайжон раҳбари.

Унинг сўзларига кўра, сепаратизм ва Тоғли Қорабоғни Арманистон билан бирлаштириш ғояларига барҳам берилган. 

“Озарбайжон қонунларига бўйсуниш, Озарбайжоннинг содиқ, одатий фуқароси бўлиш, сохта ‘давлат атрибутларини’ ахлат қутисига ташлаш ва парламентни тарқатиб юбориш”, — дея Бокунинг Қорабоғдаги арман аҳолисига қўйган талабларини санаб ўтди Алиев.

Аввалроқ Арманистон бош вазири Никол Пашинян Тоғли Қорабоғни Озарбайжоннинг бир қисми сифатида тан олишга тайёрлигини маълум қилганди.

25 май куни Москвада бўлиб ўтган Олий Евросиё иқтисодий кенгаши йиғилишида Пашинян ва Алиев бир-бирининг ҳудудий яхлитлигини тан олишга келишиб олган.