Самарқандда одамларга фоизга пул бериб, товламачилик йўли билан қайтариб оладиган аёл қўлга олинди, деб хабар бермоқда вилоят ИИБ матбуот хизмати.
Маълум қилинишича, аёл шу йўл билан фуқароларнинг уйлари, тилла тақинчоқлари ва бошқа моддий бойликларини ўзлаштириб олган. Хусусан, 35 ёшли фуқарога катта миқдорда пул қарз бериб, эвазига яшаб турган уйини ўз номига расмийлаштириб олган. Қарздор пулни қайтариб берса-да, уйини қайтармаган. Олган қарзини 4 баравар кўпайтириб, фоизини ҳам ошириб, ундан пул талаб қилган.
Вилоят ИИБ ва ДХХ вилоят бошқармаси ходимлари ҳамкорлигида Самарқандда ўтказилган тезкор тадбир давомида аёл катта миқдордаги пулни товламачилик йўли билан олаётганида ушланган.
Айни пайтда унга нисбатан Жиноят кодексининг тегишли моддалари билан иш қўзғатилган бўлиб, тергов ҳаракатлари олиб борилмоқда.
Изоҳ (0)