Аввалига калтаклангани, кейин фермерлар норозилигига сабаб бўлгани айтилган қашқадарёлик блогер 15 суткага қамалди

Қашқадарё вилоятининг Яккабоғ туманида фаолият юритувчи блогер Элмурод Одилов 15 суткага қамалди. Бу ҳақда “Дарё”га Ички ишлар вазирлиги ахборот хизмати раҳбари Шоҳрух Ғиёсов хабар берди.

Ғиёсовнинг маълумот беришича, бировнинг пулини олиб, жамоатчилик назоратини суиистеъмол қилган ва жанжал эвазига мавҳум манфаатларга эришмоқчи бўлган блогер суд қарори билан шу тарзда жазоланган.

Яккабоғлик блогер аввалига пилла пунктида Ички ишлар ходимлари томонидан аёвсиз калтаклангани хабар қилинганди.

“Дарё” манбаси мазкур вазият ҳақида гапирар экан “Уриб телефонларини синдириб ташлашди. Ўша ерда турганлар воқеани телефонига олди. Дарвозадан олиб чиқиб ураётгани, судраб, телефонларини синдираётгани ўша ердаги камерага ҳам тушган бўлиши керак”, деганди.

Блогер калтакланган пайтда воқеа жойида бўлган бошқа манба эса ИИБ биносидан тонгги 04:00 да қўйиб юборилганини айтганди.

“Воқеани кўрдингми деб сўрашди. Мен ичкаридаги воқеани кўрмаганимни айтдим ва эрталаб тонгда уйга қайтдим”, — деганди манба.

“Дарё” мухбири калтакланган блогер катта эҳтимол билан Яккабоғ тумани ҳокими ўринбосари Фозил Хидировнинг ёшлар етакчиларига берган топшириқлари ижросига бағишланган йиғилишни ёритишга уринганини, бироқ, тўсиққа учраганини аниқлаганди.

Фозил Хидиров тумандаги барча ёшлар етакчиларига мурожаат қилиб, блогер калтаклангани айтилаётган йиғилишга тайёргарлик кўриб боришлари кераклигини, ҳамма сафарбарлик чақирувчи резервига бир нафардан фуқарони жалб қилиб, шартнома пулини тўлатиб бориши кераклигини уқтиргани, буни қилмаганлар ишдан бўшатилиши мумкинлигини айтганди.

Туман ҳокими ўринбосарининг бу қилмиши борасида туман ҳокимлиги ҳозирча маълумот бермади. “Дарё” журналистининг Фозил Хидировга боғланишга ҳаракат қилган барча уринишлари бесамар якунланди.