Хоразмдаги ихтисослаштирилган мактаб ўтказган 94 млн сўмлик тендер бекор қилинди
Хоразм вилояти Қўшкўпир туман давлат ихтисослаштирилган мактаби 94 млн сўмлик тендерни ноҳалол ўтказгани ҳақида хабар берилганди. Коррупцияга қарши курашиш агентлиги ҳолатга муносабат билдирди.
Қайд этилган ҳолатлар агентлик мутахассислари томонидан ўрганилган. Аниқланишича, Президент таълим муассасалари агентлиги тизимидаги Қўшкўпир туман ихтисослаштирилган мактаби буюртмачилигида маънавият тарғибот стендлари сотиб олиш ва ўрнатиш юзасидан 94,8 миллион сўмлик танлаш ўтказилиши ҳақида эълон жойлаштирилган. Муассаса харид комиссиясининг 19 май кунидаги ғолибни аниқлаш баённомаси билан “Р.И” МЧЖ танлаш ғолиби, “М.Й.Ф” МЧЖ эса захирадаги ғолиб деб топилган.
“Ўрганиш давомида танлашда ғолибликни қўлга киритган ҳамда захирадаги ғолиб деб топилган жамиятларнинг таъсисчи ва раҳбарлари ўзаро аффилланган шахслар бўлса-да, улар харид комиссияси томонидан харид қилиш жараёнидан четлатилмагани ва натижада “Давлат харидлари тўғрисида”ги қонуннинг 42-моддаси талаблари қўпол равишда бузилгани аниқланди”, — дейилади хабарда.
Ёзилишича, шу ва бошқа қонун бузилиши ҳолатлари юзасидан 22 май куни харид комиссияси баённомасини бекор қилиш юзасидан тақдимнома киритилган.
Бундан ташқари, қонун бузилиши ҳолатларига ҳуқуқий баҳо бериш учун тўпланган ҳужжатлар Давлат молиявий назорат инспекциясига юборилган.
