Маданият ва туризм вазири Озодбек Назарбеков 25 май — Сўнгги қўнгироқ байрами муносабати билан Тошкент шаҳри Яшнобод туманидаги 255-мактабга борди. Вазир у ерда битирувчи ўқувчиларни байрам билан табриклаб, улар билан суҳбатлашди, деб хабар бермоқда “Дарё” мухбири.
Озодбек Назарбековнинг айтишича, вазирлар ва ҳокимларнинг ҳудудлардаги мактабга бориб, ўқувчилар билан учрашиш ташаббуси президент кўрсатмасига асосан амалга оширилган.
“Президент топшириғи билан турли вазирлар, вилоят, шаҳар ва туман раҳбарлари ҳудудлардаги мактабларга ташриф буюришни бошлаганди. Шу сабаб охирги икки йилда Ўзбекистондаги кўплаб ҳудудларга бориб, ўқувчилар билан учрашувлар ташкил этдик. Бу лойиҳа мактаб ўқувчилари билан суҳбатлашиб, муаммоларини ўрганиб, илм-фанга бўлган қизиқишларини ошириш, мотивация бериш, кейинги ҳаётга бўлган ишончларини кучайтириш мақсадида жорий этилган. Бу яхши натижа беряпти. Биз ҳам санъатга алоқадор айрим мактабларга бириктирилганмиз, биз улар билан, ота-онаси билан доимий мулоқотдамиз, соҳа бўйича энг шижоатли ёшлар билан ишлаяпмиз.”, — деди вазир.
Унинг таъкидлашича, вазирлар ва ўқувчилар учрашувлари ортидан мактаблардаги кўплаб муаммолар ҳал бўлишига эришилмоқда.
“Кўряпмизки, мактабларнинг сифат даражаси ошиб боряпти. Вазирларнинг ташриф буюриши ортидан эса ўша мактабларнинг кўплаб муаммолари ҳал бўляпти. Юқори ташкилотларга мурожаат қилиш мактабнинг ўзида қолиб кетмаяпти-да, ўша вазир орқали масалалар ечилиб кетяпти”, — деб айтиб ўтди Озодбек Назарбеков.
Вазир, шунингдек, одамлар тараққиётга фақат илм орқали етишиш мумкин эканини тушуниб етганини билдирди.
“Таълимга бўлган эътибор халқ ҳаракатига айланди. Нажот илмда эканини тушуниб етдик. Ҳозир ўқитувчилар, ота-оналар ҳам талабчан. Халқимиз ёшларга билим бериш орқалигина тараққиётга эришишимиз мумкинлигини тушуниб етди”, — дея сўзларини изоҳлади у.
Изоҳ (0)